MZSU office atana luah lailawk tur Commerce & Industries Office building

04 Nov 2026: Mizoram sawrkara Higher & Technical Education (H&TE) Minister Dr Vanlalthlana chuan vawiin khan Lunglei tlawhin, Mizoram State University (MzSU) chungchangah official-te leh tlawmngai pawlte nen Lunglei High Powered Committee (HPC) Conference Hall-ah an ṭhu khawm a. MzSU office atana building luah lailawk tur te, MzSU office sakna tur hmun te, Government J. Buana College ram chhunga Women Sports Centre sak mek leh Mizoram Engineering College (MEC) chei ṭhat hna thawh mek te an en ho.

Lunglei HPC Conference Hall-a inkawm hona hun buatsaihah H&TE Minister Dr Vanlalthlana chuan Mizoram Engineering College chungchangah kuminah class ṭan hman tum a nih lai leh Mizoram Polytechnic Lunglei (MPL)-ah class ṭan rawih tura ruahman a nih laiin All India Council for Technical Education (AICTE) aṭanga phalna leh pawmpuina (approval) lehkha dawn tlai a nih avangin ṭan theih a ni rih lo tih sawiin, theih tawpa hma lak leh bawhzui zel a nih thu a sawi.

MzSU pawh office neih fel a nih chuan kalpui nghal theih a nih thu leh a hmun cheina leh bungraw lei nan cheng nuai 50 chuang a awm sa thu sawiin, a hmun en fel a, hma lak ṭan nghal tum a nih thu a sawi a. Office neih a nih chuan thawktu pawimawh indah chhoh zel niin, hma lakna chak taka kalpui chhoh va, kum 2032-ah chuan a nih tur ang taka kaltir turin ruahmanna siam a nih thu a sawi.

H&TE Minister chuan MzSU chungchanga Lunglei mipuite ngenna chu sawrkarin zahawm a tih thu leh harsa tak chunga tihhlawhtlin a nih thu sawiin, Aizawl leh ram mipuite pawhin Lunglei lam ngenna an zah a, an hriat thiam bakah, an pawmpui nia a hriat thu leh lawmawm a tih thu a sawi a.

Tun hnaiah Mizoram puma school 93 sak ṭhatna tur tender tih chhuah a nih thu leh Lungleiah leh Mizoram pumah zirna tihchangtlunna leh hmasawnna tur ruahmanna leh hma lakna ṭhahnem tak a awm mek thu te, hna thawhte lang tlang taka kalpui tum a nih thu leh Samagra Shiksha hnuaia hna thawh kal mekte pawh online-a en theiha dah a nih thu sawiin, hmasawnna hna thawh hrang hrang chu mipuite’n kan vil rawn chuan tu ma’n hna chhia an thawk ngam lo vang a, lang tlang taka thil tih a nih chuan sawrkar thuneitute leh hna thawktute pawh an ṭangin, hna ṭha a awm ngei ang, a ti a. MLA, Councillor, khawtlang hruaitute leh NGO-te an ṭan ho chuan Lunglei leh Mizorama zirnain hma a sawn zel ang tiin, sikul leh colleg te tlawh peih a, ngaihven turin a chah.

Lunglei HPC Vice Chairman Pu V. Malsawmtluanga chuan HPC member-te’n MzSU office tur hmun hrang hrang enin, theih tawpa an bawhzui thu a sawi a. Mizoram sawrkar hotute’n MzSU atana hma an laknaah lawm thu sawiin, MEC chungchangah pawh sawrkar hotute’n theih tawpa an beihna rah hmuh tur a awm chho mek leh a taka kalpui theih tura a awm chu lawmawm a tih thu a sawi.

He hunah hian Lunglei South bialtu MLA Pu Lalramliana Papuia, Lunglei Municipal Council (LMC) Chairman Pu Lalzuithanga leh Councillor-te, sawrkar official-te, HPC member-te, YMA Sub-Headquarters Lunglei hruaitute, zirlai pawl hruaitute, MJA hruaitute, MzSU Demand Committee leh political party hruaitute an tel a ni.

Minister chuan hmun hrang hrang a tlawh kual nghal a. MzSU office tur Government Aizawl College-a dah tawh chu chhim lamah MzSU hmunpui sawn a nih tak avangin Lungleiah office hmun tur zawn niin, Commerce & Industries (C&I) Office building chu luah lailawk atan dil a ni a. Commerce & Industries (C&I) Department lam aṭanga phalna hmuh fel tawh niin, H&TE Minister ho hian building dinhmun leh hma lak zui dan tur a hmunah en ho a ni a. A ṭul angin chak taka hma lak zui nghal tum a ni.

MzSU hmunpui dinna tur ram atana Pu P. Lalnuntluanga, Ramzotlang, Serkawn te chhungkuain Melte, Serkawn ram chhunga ram bigha 12-a zau an pek chu H&TE Minister ho hian a hmunah en ho nghal a ni a. He lai ramah hian MzSU hmunpui tur, Administrative Building, Quarters, Multipurpose Hall leh IT Centre, Guest House, Teachers Training Centre leh hmun pawimawh tak tak sak tur niin, hemi atan hian cheng vaibelchhe 150 vela hma la turin ruahmanna siam chhin a ni a. A panna kawng hi HPC aṭangin ruahman a, hma lak mek a ni a. Zirna school chu college hrang hrangah dahin, hmunhma leh thawktute pawh inhman ṭawm tura ruahman niin, Post Graduate leh Ph.D thlenga zirna awm tura ruahman a ni.

H&TE Minister hian PM-USHA hnuaia GJBC campus tur chhunga cheng vaibelchhe 2.98 senga Women Sports Centre sak mek chu en nghalin, MEC chei ṭhat mek leh hmabakte a enfiah bawk.

Mizoram Engineering College-ah hian building ding lai 8 – Academic Block, Administrative Block, Workshop/Laboratory, Library, Boys Hostel, Girls Hostel, Cafeteria leh Students Common Room te a awm a. Sawrkarin a thawm ṭhatna tur cheng vaibelchhe 28.03 a ruahman chu kawng (approach road) siam hna PWD kutah, tui pekna leh dah khawlna (water supply & storage) siam hna PHED kutah, eng pekna leh transformer bun hna P&ED kutah leh H&TE kutah campus tihchangtlun hna te, hmanrua leh bungraw hrang hrang leina tur te dah a ni a. Tun dinhmunah P&ED leh PHED te hna hi zo tawhin, PWD hna hi 51% an zo tawh a. H&TE aṭanga Campus chei ṭhat hna (physical work) hi 85% vel zawh tawh niin, hmanrua leh bungrua eng emaw zat chah thlen a ni tawh a, a ṭul ang ang chak taka bawhzui mek a ni a. A chung far leh tui put nasa chu a puma tiphui tura sawngbawl (treatment tih) niin, tihphui a, rawng hnawih ṭhat vek a ni a. Ceiling, electric wiring leh chei ṭhat ngai hrang hrang pawh chei ṭhat mek niin, tihfai, rawng hnawih thar, plaster leh siam ṭhat tur hmabak a la awm bawk a. Hei bakah hian RUSA 2.0 Preparatory Grant aṭangin MEC tuai hnum lehzual nan cheng nuai 40 dah belh a ni bawk. (DIPR)