UD&PA leh LMC chhunfin leh SDO (Sadar) chungchang CM hnenah thlen

06 Nov 2026: All NGO Co-ordination Committee Puipa te chuan Chief Minister vawiin khan Circuit House Lungleiah hmuin, Sawrkar in UD&PA Department Lunglei leh Lunglei Municipal Council (LMC) chhunfin tura hmalakna kal mekah tun dinhmunah chuan LMC dinhmun te leh hmasawn mekna te enin la chhunfin rih loh nise tiin an thlen a, hemi chhanah hian Home Minister leh LMC lam te nen pawh NGOCC te hian an lo sawiho tawh a ni.

Allocation of Business chungchangah UD&PA leh ULB (LMC) te inzarzawm theih dan an hriatthiam thu leh LMC chuan duhthusamin mahni ke a ding thei khawpin ala phuisui lo a, Term khat pawh la hmang lo leh thuam chak hmasak phawt ngai anla tih thu sawiin chutihrual chuan UD&PA Department pawh LMC pawn a Notified Town Tlabung tan pawh a hnathawk tur nei a la nih thu an thlen a.

Chief Minister Pu Lalduhawma chuan sawrkar inrelbawlna awlsam zawk nana UD&PA leh LMC chhunfin tura ruahmanna chu kalpui an nih thu NGOCC hruaitute hi a lo hrilh a ni.

NGOCC hruaitute hian tunhnaia Lunglei a SDO (Sadar) hnamdang dah anih chungchang thlenin District thuneitu lian hnamdang vek an nih chu District dinhmun leh a dawrtu mipui te dinhmun enin a fel hlel deuh a an hriat thu sawiin SDO (Sadar) hi mipui nawlpui dawr ber leh District Administration-a mawhphurhna pawimawh tak chelh tu, document pawimawh tak tak pechhuak thei tu an nih vangin, Mizo tawng leh hnam ze hre chiang tawk lo officer a thut hian mipui dawrtute tan tawng inanglo ta chu harsatna leh mamawh thlen kawng ah mipuiten an tawng khawp lovin kan hria a, hei vang hian hna a awlsam zawnga a kal zung zung lohnate leh mipui dawrtuteah harsatna hrang hrang a thlen a an hriat thu an thlen a.

Chief Minister pawhin hma an lak tur thu leh tihfel thuai anih tur thu a lo hrilh a ni.

All NGO Co-Ordination Committee-ah hian YMA, MHIP, MUP, MZP, MSU bakah Chhimbial Chhantute an tel a ni.