15 Oct 2024: Mizoram Disaster Management & Rehabilitation Department chuan vawk pul hri leng mek African Swine Fever chu State Disaster-ah a puang.
Nimina Sawrkar thuchhuah tarlan danin, ASF chu state disaster-a puan anih bakah State Disaster Management Authority (SDMA) hriatpuinain kum 2024-a khuarel chhiatna zingah ziah luh a ni a, SDMA State Executive Committee chuan ASF avanga Mizorama harsatna hrang hrang thleng leh sum hloh hi Disaster Management Act, 2005 hnuaiah State Disaster Response Fund (SDRF) atanga zangnadawmna pek an ni dawn a, a kalphung turah State leh Sawrkar laipui Disaster Response Fund kalpui danin hmalak a ni dawn tih an sawi bawk.
Hemi chungchangah hian AH & Vety Minister Pu C. Lalsawivunga chuan kar hmasa nilaini-a Vawk suat avanga zangnadawmna semchhuah phalna a tlangzarhnaah ASF hrileng chu Mizoramin an tuar nasat avangin State Disaster-a puan turin hma an la a ti a, vawk thite sumdawnna a hmang a, zuar an awm thin chu tawp se a duh thu a sawi a, natna darh zel loh nan fimkhur theuh turin mi tin te a chah a, Vawk vulhtute rilru put hmang siamthat a tul thu sawiin, ASF avanga vawk thi te tuihawk luankawr, khama paih leh uluk lo taka phum ching an awm thin chu pawi a tih thu a sawi bawk.
ASF avang hian kuminah Mizoram hmun hrang hranga khua leh veng 246-ah vawk 13,889 a thi tawh a, vawk 23,272 suat ni tawhin Mizorama ASF hri a len tirh atanga nimin thlenga vawk thi leh suat chu 1,09,498 a tling tawh a ni. (AIR)
