Aizawl leh a chhehvelah Dengue natna a hluar mek

13 Nov 2025: Aizawl leh a chhehvela Dengue natna hluar mek chungchang-ah State Vector Borne Disease Control Programme (SVBDCP), National Health Mission, Health & Family Welfare Dept. chuan vawiin atanga tanin ni 2 chhung awh turin ATI Auditorium, MINECO, Khatla, Aizawl ah Aizawl Municipal Corporation (AMC) huamchhunga Local Council 87 atangin member 2 zel kokhawmin Dengue natna chungchanga inzirtirna leh invendan bakah khawtlang te nena Dengue tirem tura thawh ho dan tur sawihona hun an nei a ni.

He hunah hi Dr Lalzawmi, Additional Director cum State Prog Officer (VBD),NHM chuan kaihruaiin, Local Council aiawh kalkhawmte hnenah lawmthu sawina neiin Powerpoint Presentation hmangin Mizoram leh India rama Dengue dinhmun tlangpui tarlanna hun a nei a. Malsawmtluangi Pachuau, Consultant, Deborah Lalpuii, Consultant leh Dr. Lalfakzuala Pautu, State Entomologist hnen atangin Dengue natna chungchang sawifiahna leh inzirtirna hun hman a ni a. Dr. PC. Lalhmingliana, Jt. Director (Malaria) kaihhruaina in Local Council member te nen zawhna leh sawihona hun hlawkthlak tak hman a ni.

Mizoramah kumin Jan 1st – 10th Nov, 2025 hian Dengue natna exam zat 27950 niin, Dengue natna hmuhchhuah zat chu 1846 a ni, kumin 2025 ah Dengue natna avanga nunna chan 1 an awm tawh bawk. Kumin 2025 a Dengue natna hmuhchhuah zawng zawng atangim AMC area chhunga mi hi 975 niin, 52.82% a ni. (DIPR)