17 March 2025: Aizawl Mayor Pu Lalrinenga Sailo chuan Aizawl Treasury Bazar chu mipui him zawk nan leh Mizoram hmun pawimawh Assembly House awmna bul hnai anih avangin hmun him zawka sawn a ni dawn tih a sawi.
Vawiina Aizawl Treasury Bazar kang a tlawhnaah he thu hi sawiin Pu Lalrinenga Sailo chuan, Aizawl Treasury Bazarah chuan chhiatna hrang hrang a lo thleng tawh thin a ti a, a bula chengte tan tun dinhmunah a him tawk loh avangin helaia bazar insawnna tur Tuikual venga AMC Complex-ah ruahman a ni a ti a, Aizawl Treasury bazar chu a him zawk nan tun dinhmunah mipui tana tlawh pawh theihloh turin ruahmanna an siam tih a sawi.
Aizawl Police OC Pu Lalnunmawia chuan kangmei chhuak chu tukin dar 3:00 vela thleng a ni a ti a, Foresic hovin evidence an lak atangin a kan chhan an hriat theih a beisei tih sawiin hmalak mek a ni tih sawi.
Hetihlai hian Aizawl Treasury Bazar Association President Pu HL Chhingpuia chuan AMC-in an awmna hmun sawn an tumnaah ei hmuh zawh an inring lo a ti a, an thuthmun Treasury ami chu sawn lo turin sawrkar an ngen dawn tih sawiin, an eizawnna innghahna ber anih avangin sawrkarin ngaihsak se an duh thu an sawi bawk.
Aizawl Treasury Bazar kangah hian thil a kang chhe nual a, building chung bera PAMRA Office, Assam type bungrua leh thil pawimawh kangin a bula I&PR Office darthlalang pawh a keh nasa hle a ni. (AIR)
