Aizawl Trinity Hospital thlanga lei laitu chu a hnathawh titawp tura hriattir a ni
05 June 2024: Tun hnaia Aizawl Trinity Hospital thlanga phalna mumal nei lova lei a laih avanga leimin nasa tak a thlen avang leh chhiatna tam tak a thlen avangin Pu David Lalhmangaiha, Chanmari, Aizawl chu a hnathawh mek titawp tura hriattir a ni.
Pi C.Lalduhzuali, Sub Divisional Magistrate, Aizawl Sadar Sub-Division, Aizawl chuan June ni 3 khan thuchhuah siamin Pu David Lalhmangaiha, Chanmari chuan Trinity Hospital thlang lamah thuneitute aṭanga phalna mumal awm lova lei a laih avangin May ni 28-ah leimin a thlen phah a, he leiminah hian Assam Type in pakhat chhiain RCC building Pi Lalthangpuii in chu a tichhe bawk a, heng bakah hian Trinity Hospital transformer hman mek chu tichhiain Damdawiin hian eng an neihloh phah a ni.
Thuchhuah chuan, Pu David Lalhmangaiha hi a hnathawh lai mek tawpsan tur leh a tihchhiat zawng zawng senghawi turin a hriattir a, heng bakah hian Link Road bul ṭhutah retaining wall siam turin a hriattir a, heng bakah hian in a tihchhiat te siam ṭha leh tura thupek chhuahin heng siamṭhat nan hian ni 30 hun a pe a ni.
Hetih lai hian Trinity Hospital Medical Director Dr K.Lalbiakzuala chuan thuchhuah siamin, electric transformer dahna hnuai kawngko laih vanga leimin buaipui anih laia cyclone Remal rawn ken ruah baw-hawk sur avangin hospital electric supply a khaihlak hlauhthawn thu-ah ICU damlo pahnih Ebenezer Hospital-ah sawn phei an ni a ti a. Hospital building chu engmah hlauh-thawnawmin a awm lo tih a sawi. Trinity Medical Director chuan Generator nen electric supply pawh pangngai takin siamthat leh nghal a ni a ti a, social media lama hospital building hlauhawm anga tihdarh leh damlo tam takin rawn pan ngam loh phah nan an hmang chu pawi anti hle tih sawiin, Hospital building leh a chhunga thawktute leh damlote tana hlauh turin engmah hlauhthawn tur a awm lo tih a sawi a ni. (AIR)
