Arunachal-a Missionary harsatna tawhah RSS leh BJP-te inrawlh anga sawi chu thu diklo niin tarlang
24 Sept 2025: Vawiin chawhnu dar 1:00 khan Lunglei District BJP President Pi R.Lalbiaktluangi leh a thawhpuite chuan Lunglei Press Club-ah thuthar thehdarhtute an kawm.
Pi R Lalbiaktluangi chuan hmanni deuh lawka Arunachal-a BCM Missionary pakhatin harsatna a tawh chungchang leh Sikul thlengin harsatna a tawh kawngah RSS leh BJP-te inrawlh anga sawi chu thu diklo a ni, a ti. Hemi chungchang an hriat veleh hian Mizoram BJP hruaitute chuan chhan chhuah tumin theihtawpin hma an lak thu a sawi a, amah ngei pawhin Field Director-te pawh bia-in theih ang anga hma an lak ve thu a sawi a. Arunachal-a Missionary-te chunga harsatna thleng chu pawi an tih thu leh Kristianten harsatna an tawh apianga BJP leh RSS tih anga sawi thin chu a dik leh dik loh finfiah thin nise an duh thu a sawi.
Chanchinbumite zawhna, Missionary-te chhanchhuah an duh tak tak chuan engatinge Arunachal BJP sawrkar hruaitute an biakpawh loh tih chu chhangin, Missionary-te harsatna tawh hi BJP tih anih loh avangin Arunachal BJP Sawrkar hruaitute biak hi Mizoram BJP chuan tul a ti lo va, chutih laiin BCM Kohhran hruaitute leh Field Director lam atangin kan hriat duh min hrilh si lo va, kan puih an duh lo em ni aw kan ti a ni; Lunglei Dist BJP President chuan a ti.
He hunah hian Pu K.Vanlalvena, District BJP Vice President chuan, Kohhran hote’n Missionary-te tana kan tawngtainaah thudik hre si lo va ‘RSS leh BJP-te avangin’ kan ti fo mai te hi a rilru natthlak a ni, a ti.
