ATL Road-ah chak taka thawk tura inbuatsaihna kalpui anih thu MLA Pu T Lalhlimpuia’n a sawi

05 Oct 2026: Vawiin dar 11:00 Am khan ZPM Southern Hqrs. Lunglei chuan an Party Office-ah Chhung inkhawm leh Political Session hun an hmang a. He huna thusawitu dang, ZPM General Hqrs Treasurer Pu T Lalhlimpuia MLA (Lunglei West Bialtu) chuan Lunglei khawpui chhung cheina atan UD&PA Deptt. hnuaiah Rs.12.55 Vbc sanction fel anih thu leh he sum hmang hian Pukpui – Hrangchalkawn inkar kawngpui dung chei a ni ang, a ti.

Pu Mahlima MLA, PWD Minister puitu ni bawk chuan Lunglei khawpui chhung kawng siam turte chu Krismas hmaa siam zawh beisei anih thu leh ATL Road-ah pawh chak taka thawk tura inbuatsaihna kalpui anih thu leh tunah hian Thenzawl – Buangpuiah Camp pakhat dah a nih thu a sawi a. Kawng siam hna lo thawh tawh chinah Fur ruah avanga chhia a awm loh thu leh leimin avanga chhia hmun hnih khatah a awm thu Pu Mahlima MLA chuan sawiin, engemaw thil man to chho avanga estimate siam that tura kalpui a awm thu a sawi.

Tunah hian ATL Road-ah Lunglei chan huam chhung bikah kawng chhe zual lai chu hmalakna hmasa turin hmachhawp anih thu PWD Minister puitu Pu T Lalhlimpuia MLA chuan a sawi a, kawng siam hnathawhah hian a nihna tak Estimate leh Ground Reality hi mipuite hian hriat kan tuma, chumi anga theih tawp chhuahtu kan nih ve pawh a pawimawh a ni a ti.

KMMTTP Development-ah Mizoram Sorkarin a hlawkna kan tel theihna turin hma ala tih Pu T Lalhlimpuia MLA chuan sawiin, Lungleiah hian Jt. Commissioner of Taxes dah tura ngenna pawh awm mekin, KMMTTP-ah hian Mizoram Sorkar chuan Logistic Hub lian neih tumin ruahmanna a kalpui mek zel a ni tiin, Lunglei mipuite pawhin a hlawkna leh hmasawnna tel tura ke kan pen zel a tul a ni, a ti.