ATL Road siam mek a hmunah en

02 Dec 2025: Vawiin khan ZPM Southern Hqrs Lunglei Media te chuan Aizawl – Thenzawl – Lunglei Road siam hnathawh tan chhoh meka Lunglei PWD enkawl chin Kanghmun South to Pukpui chu a hmunah an tlawh.

Pukpui to Tlawng inkar kawng chhe zual lirthei tlan vel tan pawha zawh hreawm zual leh rit phur lir thei lian te tana tluk hlauhawm thin lai te chu SLT Company-a thawktute chuan hmalakna hmasaah nei mekin, kawng hi an rit rual tawh a, a hma aiin lirthei lian leh te tan pawh tlan a nuam ta niin an sawi.

He kawng siam hna thawktu SLT Company te hian Mausen khawdaiah an bungraw tul tur khawl chi hrang hrang an bun mek a, chubakah an hnathawktu tur mi tam zawkte awmna tur In te an siam mek a. Kawng siamtute hi mipuite beisei anga kawng tha tak siam tur leh hna tha leh chak thawk tura duhna ngaih pawimawh sak tur pawhin an ngen tih an sawi.

Hetih rual hian ATL Road siam hna thawh tan chhoh mekah hian Sorkar thuneitute estimate an siam anga thawktu lam ten hna an thawh zel theihna tur leh kawng tha an siam ngei theihna tura Pu T Lalhlimpuia MLA, ATL Road vil tura ZPM Southern Hqrs Lungleiin a ruat ni bawk chuan mipuite thawhpuiah a sawm a,  lirthei he kawng zawhtu leh hmangtu zawng zawngte kawng siam avanga khaw muan lo ngai ta thilah te hnathawktute hmalakna ngaichang thiam chunga inhriatthiamna nei turin a ngen a. Kawng siam avanga lirthei tlan dan thuneitu lamin an ruahman ang te pawh sawisel leh phun mai lova zawm thiam turin a ngen a ni.

ATL Road chungchangah hian Pu C. Lalhmingliana President ZPM Southern Hqrs, Lunglei pawhin kawng tha kan neih theihna turin mipuite thawhpuiah a sawm a, Chief Minister Pu Lalduhoma leh a kaihhruai Sorkarin ATL Road siam ngai pawimawh a, sum leh pai pawh a tul dan zela ruahman tura hma an lakna chu lawmawm a tih thu a sawi bawk.

ATL Road Pukpui to Kanghmun South kawng siam turah hian tuna sum dah chuan a daih dawn loh thu leh sum dil belh mek zel a ni tih an sawi a, kawng tha kan neihna atan kan theihna chin theuhva Sorkar hmalakna ngaichang thiam zel turin mipuite thawhpuiah ZPM Southern Hqrs, Lunglei chuan an sawm tih an tarlang bawk.