ATL Road siam mekah Agreement ami ni lo lung lakte hmang chhunzawm lo turin hriattir

28 Nov 2025: Vawiin khan Road Monitoring Committee, YMA Sub Hqrs Lunglei chuan SLT Company-te hnathawh ATL Road siam mek chu a hmunah an tlawh.

Road Monitoring Comtt, YMA Sub Hqrs Lunglei hruaitute chuan he kawng siamna tur atan SLT Company leh PWD te Agreement-ah Zawngek kham Quarry ami lung hmang tura tih annih laiin Haulawng Quarry ami lung an la tih hriat avanga kal annih ber thu an sawi a. YMA hruaitute chuan Agreement ami ni lo lung an lakte chu hmang chhunzawm lo turin an hriattir nghal a ni.

He kawng siam tur (Mausen to Pukpui dai) hi km 17 bawr vel a ni a, km 2 vel chiah Side drain siamna tur sum dah a ni chu mak an tih thu leh Leimin tamna hmun hrang hrangah a dawlna tur ruahmanna siam mumal a awmlo chu mak an tih thu an sawi.

He hunah hian PWD Engineer-te leh SLT Engineer-ten an lo dawngsawng a, YMA hruaitute hian hna ṭha taka thawk tur leh a hun taka zo turin an ngen nghal.

Kawng chungchanga hmalak ngai leh bawhzui ngaite chungchang sawipuiin, Pu SR Lalramthanga Sr EE PWD chu a office Chamber-ah an hmu nghal.

He hunah hian Pu K.Vanlalhruaia Chairman, Pu H.Lalhmingthanga Secretary leh member, Road Monitoring Committee te an kal a ni.