ATL Road siamtute khawl suasamtu chhui chhuah dan chu

12 Jan 2026: Lunglei District Superintendent of Police Pu J. Lalmuankima chuan vawiin khan thuchhuah siamin, ATL Road siamtute khawl suasamtu chhui chhuah kawnga Lunglei Police hmalak dan a tarlang.

Lunglei SP thuchhuaha tarlan anih danin, SLT Company te’n ATL (Aizawl-Thenzawl-Lunglei) Road an siam mekah an kawng siamna khawl Pukpui, Lunglei daia an dah chu Dt. 04.01.2026 leh Dt. 10.01.2026 inkarah mi tu tih hriat lohvin lo suasamin, Tandem Roller leh Sensor Paver machine electric wiring tan chhiaa an ruk bo bakah, diesel litre 100 vel a bo tel bawk a. Lunglei District-a Mausen Camp-a inkulh SLT Company Site Engineer Subrata Patra chuan Lunglei Police Station-ah FIR (First Information Report) theh lutin, Lunglei PS-ah thubuai ziah luh niin, Lunglei Police chuan theih tawpin pawi khawihtu hi an chhui zui nghal a. Police-te leh FSL (Forensic Science Laboratory) expert-te chuan thil thlenna hmuna evidence pawimawh turte la khawmin, he pawi khawihtu hi man ngei tumin hma an la a.

Dt. 12.01.2026 zingah Zotlang YMA leh Pukpui VDP te nena ṭang kawpin he pawi khawihtu ni ngeia hriat, T. Lalrinmawia (39) s/o T. Rongura (L), Pukpui, Lungleia khawsa nia inchhal chu man a ni a. Thu zawh fiah a nih hnuah pawi khawihnaah hian a inhnamhnawih ngei a ni tih police hmaah a sawi a. Thu zawh fiah chhunzawm niin, thil ṭul angte tih chhunzawm zel a ni ang. (DIPR)