09 May 2025: Zanin dar 7:00 khan Awareness Campaign for Myanmar Refugees Farm Veng YMA Hall-ah buatsaih a ni. He hun hi Pu H.Lalawmpuia Sub-Hqrs YMA Lunglei Executive Committee member chuan kaihruaiin Lunglei SP, Sub-Hqrs YMA, MZP Hqrs Lunglei leh MSU Regional Hqrs Lunglei aiawhte’n thu an sawi a, YMA Farm Veng Branch hruaitute leh Farm Veng Local Council member-te’n an telpui a ni.
Lunglei SP Pu J.Lalmuankima chuan, Raltlante chu kan unaute ni mahse India ram mi an nih loh avangin India dan an zawm turte hrilhfiah tura koh khawm an nih thu a hrilh a. Dan lova ramdang aṭanga motor lakluh leh khalh khap anih thu sawiin, raltlante chu hetiang laka inthiar fihlim tur leh India motor-te pawh an khalh theihloh thu a hrilh a. Tilui an awm anih chuan dan anga hrem an nih tur thu a sawi a ni.
Pu J.Lalmuankima chuan raltlan nunaute leh kum upa lamte him taka an awm zel a duh thu sawiin, an harsatnate thuneitute hnenah thlena an theihna zawnah an ṭanpui zel tur thu a sawi a. Damdawi zawrh leh tawlh chu danin a phal loh thu sawiin, hetiang ti ṭhin an hria anih chuan thuneitute hnena thlen zel turin raltlante chu a chah bawk a ni.
Pu CMS Dawnglian Vice President Sub-Hqrs YMA pawhin thu sawiin, raltlante chu thuawih taka awm turin a chah a, chhiatni ṭhatniah an awmna khawtlang tana ṭangkai taka awm turin a fuih a. Ruk hmang an awm anih chuan YMA-in a en liam mai mai loh tur thu sawiin, khawtlang inrelbawlna te zah tur leh khawtlang hruaitute leh thuneitute thu zah thiam turin a chah bawk.
MZP Hqrs Lunglei Secretary Pu K.Lalchhuanawma pawhin thu sawiin, raltlan zinga zirlai awm zatte leh an harsatna tawhte MZP Hqrs Lunglei hnenah thlen zel turin a chah a. Rukruk, ruihhlo leh dan lova sumdawnna laka inhnamhnawih lo turin a chah bawk.
Pu Lalthanglian MSU Regional Hqrs Lunglei President pawhin, MSU te’n raltlante tana an lo hmalak tawh dante leh raltlante an lo buaipui dante a tarlang a. Zirna an ngaih pawimawh thu sawiin zirna kawnga harsatna an neih chuan an tan an awm reng thu a sawi a ni.
He hunah hian Farm Veng Local Council Vice President Pu ZD Lalbiakenga leh YMA Farm Veng Branch Vice President Pu S.Sangchungnunga te pawhin thu sawiin, raltlante chu an ID ngai pawimawh tur leh a nei lo te pawhin siam vat turin an chah a, an dikna chauh hre lova an tih turte pawh hre tel ve turin an ngen bawk a ni.
Farm Veng-ah hian raltlan chhungkua 28 awmin, mi 128 an awm mek a ni.
