11 Oct 2025: Nizan khan Mizo Students’ Union General Conference vawi 23-na, Hnahthial District-a thleng chuan ‘Palai Thlah Programme’ nen kharna hun an hmang a, School Education Minister, Dr. Vanlalthlana chuan khuallian niin a hmanpui. Bialtu MLA, Pu Jeje Lalpekhlua chuan Uaptu nihna nen Conference kharna hi a hmanpui bawk.
Khuallian chuan zirlai lehkha thiam tak takte’n an chanvo tur an chang lo thin chu a tawrhpui thu sawiin chuvang chuan zirtirtu hna lakah pawh fair takin, advertisement tel ngeiin qualified leh thiam tak tak chauh an lak tawh thin thu a sawi a. Zirtirtu lak turte pawh lehkha thiam ringawt ni lova zirlaite zirtir thiam an nih ngei theih nan an exam-naah Practical Teaching an tih tel zel tawh thu sawiin dan ang tak leh fair takin Samagra Shiksha hnuaiah zirtirtu, instructor leh a dang dang mi 1,700 chuang la tawhin chu mai bakah casual teacher 1400 chuang an lak tawh thu a sawi bawk.
Tun hnaiah College zirtirtu tur mi 32 la turin an inbuatsaih mek thu sawiin, Lungleia Engineering College lo sak tawh, hman tlak lohva dah chu nakum academic session-a hman theih turin tan an lak thu a sawi a. Chutah pawh chuan a thawktu tur post siam fel ni tawhin lak theih tura ruahmanna siam a nih tawh thu a sawi bawk.
Zirlaite hnenah fuihna thuchah sawiin, mahni nuam tih chin bakah risk la ngam turin a fuih a. Engkim hian sacrifice a neih thu sawiin thil ropui deuh tih a, hlawhtlinna sang tak kan chan duh chuan chutiang mil chuan kan nunah sacrifice kan neih a tul a ni tiin zirlaite chu awmze neia risk la ngam turin a chah a ni.
Khual zahawm, Pu Jeje Lalpekhlua chuan thu sawina hun tawi hmangin rinawmna, tumruhna, hawihhawmna te leh Mizo nun zemawi chu tuna zirlai thangtharte hian rawn chhawm nung zel turin a ngen a ni.
Nizan programme hi Lalramparmawia, MSU Treasure chu kaihruaiin MSU President, B.Lalkhawngaihzuala hnen atangin thusawi ngaihthlak a ni a. Zaithiam leh lammi ten kalkhawmte chu awiin Organizing Chairman, B. Lalremsanga chuan Palai thlahna leh lawmthu sawina nen MSU General Conference vawi 23-na chu a khar a ni.
