Bangladesh sawrkar leh KNF pailaite’n inbiakna an nei tih KNF hruaitute’n an sawi
06 March 2024: Bangladesh sawrkar leh Kuki-Chin National Front (KNF) pailaite chuan a tum hnihna atan inremna siam tumin inbiakna an nei tih Kuki-Chin National Front (KNF) hruaitute chuan an sawi.
KNF-a Information &Intelligence Branch (IIB) ami, ‘Colonel’ invuah- Solomon-a chuan Bangladesh-a Chittagong Hill Tract-ah remna leh muanna tluantling a awm theihna turin he inbiakna hi neih a ni a ti a; Inbiakna hmasa ber chu Munlaipara Community Centre, Bandarban-ah nikum November ni 5 khan neih a lo ni tawh, a ti.
Solomon-a chuan he inbiakna neih zawh takah hian KNF atangin Lalzawngmawi, Lalsanglawm, Lal Englian, Graham, Pastor Vanlian, Ruallin Bawm, Sangpah Khumi leh Azo Lushai te chuan Kuki-Chin te ai an awh tih sawiin; Bangladesh sawrkar aiawhin Peace Establishment Committee (PEC) Chairman leh Deputy Commissioner Office, Bandarban Hill District aiawh bakah Superintendent of Police, Bandarban Hill District leh Directorate General of Force Intelligence hotute an tel a ni.
KNF hian Chittagong Hill Tract-a Kuki-Chin mi te, an pi leh pu te atanga ram an lo neih tawh humhalh nan leh mahni inrelbawl sawrkar din a nih theihna atan ralthuam kengin hnam chhan nan movement an kalpui tih Solomon a chuan a sawi a. KNF lam atanga thu dawn danin inbiakna hi boruak tha tak hnuaiah lungrual taka inremna siam theih beiseina sâng tak nen neih a ni.
Remna zawnga inbiakna neih chhung hian an pahnih hian inkah tihtawp rem tiin, sorkar palaite chuan inbiakna vawi thumna neih thuai tura ruahmanna siam turin KNF an ngen bawk a ni.
State Home Dept record-in a tarlan danin, nikum January 25 thleng khan Bangladesh atanga raltlan 1,167 Mizoram-ah awm a, an vai hian Mizoram chhim lam Lawngtlai Dist-a inkhuar vek an ni. A tir lamah chuan Mizoram-Bangladesh venhimna enkawltu Border Security Force (BSF)-te chuan raltlante hi Mizoramah luh an phal sak lova; amaherawhchu, state sawrkar-in tanpui ngaite tuamhlawm an ngaih avangin humanitarian ground atanga thlirin raltlante hi tuamhlawm a remtih hnu-ah Lawngtlai Dist-ah humhimna hi pek an ni leh ta a ni. (AIR)
