26 Feb 2025: Mizoram Baptist Kohhran [BCM] Assembly vawi 129-na March ni 5 atanga ni 8-a neih tur dawltu tur BCM Chanmari Kohhran leh BCM Chanmari Bial puipa te chuan vawiin chawhnu khan Chanmari Baptist Kohhran Hall-ah thuthar thehdarhtute kawmin; BCM Assembly Chanmari bialin an dawl tura a thlengtu tur Chanmari Kohhran inbuatsaih dan te an puangzar.
BCM Assembly vawi 129-na thleng tur hian Chanmari Kohhran hian Budget Rs 49,59,500 dahin, BCM Hqrs atangin tanpuina Rs nuai 10 leh Chanmari Pastor bial atanga tanpuina Rs nuai 4 an hmuh bakah bialtu MLA atanga Rs nuai 1 an hmuh nen an budget hi an tlin thei tih an sawi a, Assembly dawl tur hian Committee pêng hrang hrang 9 an siam a ni.
BCM Assembly vawi 129-naah hian Rorel Palai mi 1700 bawr vel an beisei a, inkhawm ban apiangin thingpui leh a hmeh tui tak mipuite tan sem a nih dawn bakah zingkar Bible Study-a kal te pawh thingpui leh a hmeh pek thin a ni ang an ti.
Assembly chhung hian tlaitin LMC nen tangdunin bawlhhlawh a paihna turah lirthei hmanga paih nghal zel a ni ang an ti a. Rorel palai badge chu Smart Card a siam a nih thu leh palai badge-ah hian Assembly Programme a awm nghal vek dawn thu BCM Chanmari puipa te chuan sawiin; Assembly Palai te tan an hriselna englai pawh a check theih a nih bakah Ambulance chhawp a ni dawn a, damdawi mamawh tan a thlawna lak theih a ni bawk ang an ti.
