05 Oct 2023: Oct ni 8, Pathianni zan thleng awh tur Mizoram Baptist Kohhran [BCM] hnuaia Pastor bial hrang hrangte chuan zanin atang khan Bial Inkhawmpui a rualin an hmang tan.
BCM hnuaiah hian Pastor bial 192 leh Area Baptist Council (ABC) 16 te awmin, Kohhran member– nuai 1 leh sing 7 chuang an awm mek a. BCM rorelna sângin a lo rel tawh angin Pastor Bial Inkhawmpui hi a rualtlângin kumin atang hian an hmang a ni.
Bial Inkhawmpui zanin atanga tanah hian Pastor bial tam zawkah chuan Zirtawpni hian Fellowship Department– TKP, BMP leh BKHP te’n Rorel Inkhawm an nei ang a; Inrinni-ah Bial Kohhranpui rorel neih a ni thung ang.
BCM hnuaia Pastor Bial Inkhawmpuiah hian bial hrang hrangah Bial Kohhranpui Committee-in tha a tih angin Inkhawmpui thupui neih thin niin; bial thenkhatah Speaker ruat bik an awm laiin bial tam zawkah chuan Bialtu Pastor leh bial hruaitute’n an bial inkhawmpui thupui an insawi chhãwk thung ang. Pastor Bial Inkhawmpuia bial kohhranpui rorel thu pass zinga engemawzat chu Nov thla tawp-a Area Baptist Council (ABC) Inkhawmpui–ah chhawpchhuah a ni dawn a ni.
