BCM Rorelna sang ber BCM Assembly 2026; BCM Bazarveng Lunglei Biak In tharah

17 Jan 2026: Nizan dar 7:00 khan March thla a BCM rorelna sang ber BCM Assembly dawltu tur BCM Bazarveng Kohhran Lunglei puipate chuan Pi Dari Hall, BCM Bazar Biak Inah thuthar thehdarhtute an kawm a, thuthar thehdarhtute an kawmna hi Upa C.Lalnunpuia, Chairman BCM Assembly 2026 dawltu information & Publicity Department-in a kaihruai a ni.

Mizoram Baptist Kohhran rorelna sang ber BCM Assemby chu March ni 5 atanga ni 9, 2026 chhungin Bazar Pastor bial chuan BCM Biak In, Bazarveng Lungleiah an thleng dawn a. Assembly thleng tur hian BCM Bazar Kohhran Puipate chuan an inbuatsaih meknate thuthar thehdarhtute hi an hrilh.

BCM Assembly 2026 dawlna atan hian Budget-ah Rs Nuai 45 an dah tih sawiin, Bazar Pastor bial atangin Rs Nuai 20, BCM Hqrs atangin Rs Nuai 15 leh Bazar tualchhung Kohhran atangin Rs Nuai 10 te chu an sum hmuhna a ni tih Bazar Kohhran puipa te chuan an sawi. Sawrkar Department emaw, Minister leh MLA emaw tih buai an tum lo tih an sawi bawk.

Assembly dawl tur hian Commmittee peng hrang hrang 10 an siam a, heng Committee peng hrang hrangte hian ngawrh takin hma an lak mek thu leh Assembly hlawk thlak leh nuam tisa leh thlarau lamah a nih theih nan kawng hrang hrangin an inbuatsaih mek tih an sawi a ni.

BCM Bazar Pastor bialah hian Kohhran pali awmin, member 6,221 an awm a, Assembly dawltu tur Bazar Kohhran bikah hian Kohhran member 1,720 an awm mek a ni.

Assembly palai tur hi mi 1400 bawr vel beisei an ni a, Bazar Biak In sak tharah hian mi 1,000 leng tura ngaih anih bakah a bathlar pandal zar belh turah mi 600 chuang leng thei tura ruahman a ni a, Biak In hnuai lirthei dahna hmunah lirthei za bawr vel dah theih a ni dawn bawk.

BCM Bazar Kohhran hruaitute leh Bazar Pastor bial puipate chuan Mizoram Baptist Kohhran Assembly 2026 an thlen turah tualchhung thuthar thehdarhtute chu finchhuah tur leh puanzar ngai an neihte puanzar sak thin tura ngenin thawhhona tha tak neih an duh thu an hrilh a ni.