BJP MP Candidate Pu Vanlalhmuaka’n thlantlin anih chuan MZU Southern Campus chu kumkhat chhungin a nihdan ang turin kalpui a ni ang, a ti
05 April 20245: Mizoram State BJP President leh BJP MP candidate ni bawk Pu Vanlalhmuaka chuan vawiin chawhnu khan BJP Lunglei District Office, Bazarveng-ah thuthar thehdarhtute a kawm.
Pu Vanlalhmuaka chuan kumin 2024 Lok Sabha Inthlan lo awm tura BJP candidate a nih anga Lunglei khawpui mipuite khawngaih taka amah vote turin a sawm a, thlantlin a nih chuan MZU Southern Campus, Lunglei-a dah tura sawi thin chu kumkhat chhungin a nih dan tur famkimin kalpui a ni ang a, MP ka nih chhungin Central University-ah hlankai a ni ang, a ti a. Thlantlin ka nih chuan Lunglei-a Engineering College a taka kalpui theihloh hi kumkhat chhungin a nihdan ang turin kalpui a ni ang, ti bawkin; a sawitu hian ka ti theilo a nih chuan tumah ti thei dang an awmlo, a ti thei party ami ka ni, tiin; Lunglei chu India rama khawpui mawi berte zingah kan siam bawk ang, a ti.
Pu Hmuaka chuan Lunglei By-Pass Road mai ni lo Lunglei khawpui helchhuak Circular Road kan siam dawn a ni, tiin; Prime Minister Pu Narendra Modi a nih chhung chuan tih theihloh a awm lovang, a ti.
ZPM candidate kan thlantlin chuan Delhi-ah zawmpui an neilo-a kum 5 chhung engmah ti theilo-in Parliament-ah a thu ve ringawt ang, a ti a; MNF MP-in “We Shall Kill Them All” a ti ve leuh leuh te chu Delhi lamah engtihnamah a ni lo, Lapaw ben ang lek a ni, ti bawkin; keini MP pakhat lek neiah chuan BJP State President kan thlantlin chuan Central Minister a ni dawn, a ti.
He hunah hian Pu Vanlalhmuaka tawiawmtu Dr K.Beichhua MLA, BJP State Election Managing Co-ordinator leh BJP Mizoram State in-charge Pu Davesh Kumar pawhin thu an sawi bawk a ni.
