BSNL Exchange ni thinte Online Exam cum Skill Training Centre-ah

26 Aug 2025: Vawiin khan Chief Minister Pu Lalduhoma chuan a office-ah Pi Daily Giri, Chief General Manager, BSNL, NE-1 Telecom Circle a kawm a. Mizoram tan telephone tower tam zawk leh online exam centre tam zawk awm theihna tur leh India ram khawpui thenkhata Mizoram House sak dan tur a sawipui.

Pi Daily Giri hi kumin July ni 10-a Chief Minister leh BSNL Chairman & Managing Director, Pu A. Robert J. Ravi te New Delhi-a an inkawmna bawhzuia lo kal a ni a. Pu A. Robert J. Ravi nena an inkawmna press release hi July ni 10 khan tihchhuah tawh a ni.

Mizoram hmun kilkhawr zawka zirlai leh hna zawng laiten online exam an neih dawnin Aizawl leh district khawpui an pan thin a. He harsatna hi tihnep a nih theih nan tunhmaa BSNL Exchange ni thinte Online Exam cum Skill Training Centre-a leh an remti. Mizoram hmun kilkhawr zawkten internet signal tha an neih ve theih nan Tower enge maw zat phun belh ni se an ti bawk. Tunah hian BSNL hian Mizoram tan Tower 53 phun belh tur an nei sa a. A phunna tur hmun hi sorkar ngaihpawimawh hmasak hmunah te phun phawt tur niin, a tul angin tower hi dil belh zel theih a ni.

India ram khawpui danga BSNL rama Mizoram House emaw Hostel, neitu nihna intawm (partnership pattern) hmanga din chungchang pawh an sawi a. A kalpui dan tur hi GAD lamin lo duang se, BSNL nena inbe zel chunga kalpui tur a ni ang.

Mizoram rel kawng leh rel station tharte tana mobile signal tha chhawpsak chungchang pawh an sawi a. Pi Daily Giri hian hma an lak mek thu Chief Minister hi a hrilh. (DIPR)