Bualte High School tiamchin awm lovin khar

11 Aug 2026 : Lunglei District-a Bualte khawtlang mipuite chu tukin khan Bualte High School tualah pungkhawmin, Mizoram Sorkarin a duan The Mizoram Education (Lumpsum Grants-in-Aid for General Maintenance of Private School) Rules 2026 chu duhlohna lantira au rualin; Bualte VC, All NGO’s leh Political Party hruaitu zawng zawng Press Release siam chu chhiarchhuah anih hnuah, Bualte khawtlang mipuite chuan sorkar lakah an lungawilohna lantir nan hian, Board Chairman leh Bualte VCP ni bawk Pu K.Malsawmkima chuan Bualte High School chu tiamchin awm lovin a khar.

Bualte khawtlang VC, ALL NGO’s leh Political Party-te thuchhuahah hian kum 1995 February ni 2 a din, Bualte high School chu an nu leh pa, pi leh pute’n harsa tak chung pawha an hmakhua ngaia an din sak anih angin an hlut hle thu leh MNF Ministry-in ngai pawimawha zirna in tha leh changtlung zawk ni thei tura hmalakna hrang hrang a lo kalpui sak tawh thu leh Bualte High School chu hmasawn zawnga a kal zel avangin lawmna programme hial pawh an lo siam tawh thu tarlangin, hetih laia ZPM sorkar chuan hmasawnna lam ai a a hniam zawng leh a bet zawng zela a kalpuina chu an hriatthiam loh thu leh Adhoc Aided a an hnuhhniam mai pawh duh tawk lova, Lumpsum Grants in Aid Special Category-1 ah paihthlak an ni leh chu hriathiam har an tih takzet thu sawiin, Sorkar atanga notification an hmuh chu an pawm ve theih loh thu leh khawtlang hmasawnna tura sul lo su tawhtu, an nu leh pa, pi leh pu kaltate thlarau an zah thu thuchhuahah hian tarlan a ni bawk.

The Mizoram Education (Lumpsum Grants in Aid for General Maintenance of Private School) Rules 2026 chu khawtlang school chauh ni lo, kan ram school; a bikin thingtlang tan chuan Dan Sakei nia an hriat thu thuchhuahah hian tarlang bawkin, Notification & Rules chu sut tura sorkar an ngen bakah he harsatnain a huam school zawng zawngte chu Gov’t High School a dah chho leh vek tura ngen nghal bawkin, sorkarin a hmalak dan azirin a ai a na zawka hmalak zui zel an tum thu Bualte khawtlang VC, ALL NGO’s leh Political Party-te thuchhuahah hian tarlan a ni.