Bualte lam kawng a tlang; Ruah sur dan azira ping leh thei a ni

11 July 2026: Bualte daia lei tawlh avanga zin veivakte’n harsatna nasa tak an tawh laiin tukin dar 8:00 atang khan kawng hi a tlang leh ta.

Thudawnnain a sawi danin, Bualte daia lei tawlh avanga kawng ping chu nizan zan tan tir lamah rei vak lo a tlang hnuin kawng hi a ping leh a, tukin zingkar atanga kawng tlang tura Company lamin theihtawp an chhuah hnuah zing dar 8:00 khan tlang lehin, chanchin buatsaih lai (dar 3:00pm) thleng hian kawng hi a la tlang.

Lirthei te ho tam ber chu an mahni pan tur lam hawia an tlan tlang hnuah lirthei lian rit phur thahnem tak an la ding. Heng lirthei lian ho kaltlang theih tur hian kawng hi an chhu muk a, ruah sur dan a zirin kawng hi ping leh thei dinhmunah a la ding reng a ni.

Tukin dar 8:00 atanga dar 3:00pm thleng khan lirthei tangkhang 250 bawr vel an chhuak tawh.

Tukin lamah Bualte YMA-in mi 80 vel chawei an siam sak a ni.