Buichali leh Kawnpui kawngpui a chhe hle niin MTDA president-in a sawi

15 Sept 2025: Aizawl leh Silchar inkar kawngpui dunga Buichali leh Kawnpui kawngpui chu a chhe hle a, nitinin lirthei tangkhang engemaw zat a la awm reng.

Mizoram Truck Driver Association (MTDA) president Pu H.Laldingliana’n Akashvani Aizawl a hrilh danin kumin chawhma lama a chhe zual lai an siamthat Buichali leh Kawnpui inkar chu a chhe leh deuh vek tawh a. Tun hnai maiah pawh truck tlu a awm leh nual tawh bakah Aizawl leh Kawnpui inkarah ringawt hian ni 4 ni 5 te hun an hmang thin niin Pu H.Laldingliana chuan a sawi a. NHIDCL kuta hlan anih hnu hian a khuar lai hnawh zel an tum thu an sawi nain an thawk meuh lo niin a sawi a, sorkar pawhin a nawr zui lem lo ni a an hriat thu a sawi. Hetianga kawng hi a chhiat reng chuan tlan lohte pawh an tintuah leh tawh niin a sawi a, helai kawng an kaltlang chuan an truck-te chu siamthat a ngai nasa thei hle niin a sawi bawk.

Tun dinhmunah lirthei tangkhang a la awm reng a. Tukin dar 8:30 thleng khan Kawnpui atanga Aizawl lam pan truck 538 rawn chhuah a ni a. Sairang peng leh Khamrang inkar atanga Kolasib leh Silchar lam pan truck ruak 81 chhuah a ni bawk a. Lirthei tangkhang chhuah zat hi a vai-in 619 a ni a. Hetih lai hian lirthei la tangkhang mek hi Khamrang ah Assam pan tur truck 234 a awm a, Aizawl lam pan tangkhang erawh chu tukin zing kha chuan a awm rih lo. (AIR)