19 Sept 2025: Vawiin khan Lunglei District Sports Committee (LDSC) chu Lunglei District Additional Deputy Commissioner Pi Zoramdini kaihhruaiin Lunglei DC Conference Hall-ah an ṭhu khawm a, C.Ṭhuamluaia Mual enkawl hi LDFA kutah awm zui se an ti.
Lunglei District Football Association (LDFA)-in kum hnih chhung atana C.Ṭhuamluaia Mual an enkawl chu a hun chhung a zawh tak avangin C.Ṭhuamluaia Mual enkawl zui dan tur sawi ho a ni a. C.Ṭhuamluaia Mual enkawl hi LDFA kutah awm zui se, inremna pangngai angin kum hnih chhung atan inremna ziah thar ni se, tih a ni a. Inremnaa ziak angin, LDFA hnuaia C.Ṭhuamluaia Mual Management Committee-a sum lut leh chhuak chu kumin September thla chhunga endik (audit) fel ni se tih niin, auditor atan LDSC Secretary leh Financial Secretary te ruat nghal an ni.
C.Ṭhuamluaia Mual enkawl chungchanga LDSC leh LDFA inremna angin, kum 2023 March ni 7 aṭangin kum hnih chhung atan C.Ṭhuamluaia Mual enkawl hi LDFA kutah awmin, LDFA chuan C. Ṭhuamluaia Mual enkawl tur hian Management Committee a din a. C.Ṭhuamluaia Mual hman man hi darkar khatah Rs. 200 zel niin, nilenga hman man Rs. 2,500 a ni a; darkar 4 aia rei hmang chu nilenga hmang anga chhiar an ni a. Mual aṭanga sum lak luh zawng zawng aṭanga 30% chu promotional fund atan LDSC kutah lutin, 70% chu khelmual enkawl, cheibawl leh thuam ṭhat nan Management Committee kutah a lut ve thung a ni. (DIPR)
