Mizoram chhim lama India leh Myanmar inrina hnaiha mipuite him zawk nan, Central Young Lai Association chuan Lawngtlai district kaltlangin Rakhine state-ah engmah thawn lutlo turin hetiang lama inhnamhnawihte a ngen.
Thudawn danin, Myanmar ram buaina avanga Rakhine state ah eitur leh tuialhthei mamawhna a san avangin March thla laihawl vel atang khan tuialhthei leh eitur lam chi thahnem tak Siaha district kaltlangin Rakhine state-ah thawnluh thin a ni a, hemi chungchangah hian khua leh tuite him zawk nan Central Young Lai Association chuan May 25 Inrinni zan zanlai dar 12:00 hnulamah chuan Lawngtlai district chhung leh District kaltlangin Rakhine State-ah engmah thawnlutlo turin hetiang lama inhnamhnawihte a ngen a ni.
Central YLA chuan thuchhuah siamin, Myanmar chu rambuai niin, Rakhine state chu Myanmar sorkar sipaite’n thlawhtheihna hmangte’n a beifo tih a tarlang a, ramri bul hnai takah te inbeihna a thleng fova, hei vang hian mipui tawrhna leh vanduai palh theihna a thlen a hlauhawm avangin bungraw thawnluh hi tawpsan tha a an hriat thu an thuchhuahah hian an tarlang a ni.
Rakhine State-ah hian tuialhthei leh eitur mamawhna a san em avangin a bikin Siaha leh Lawngtlai District a sumdawngte’n Lungpuk; Siaha district kaltlangin an thawnlut nasa a, bungraw phurh tur a awm tam lai phei chuan tualchhungah mamawh thila hman tur lirthei awm mumal loh chang a awm thin nia thu dawn a ni bawk. (DD)
