Central YMA hruaitute leh MJA hruaitute’n ruihhlo do kawnga hmalak dan tur an sawiho
20 Nov 2023: Central YMA hruaitute leh Mizoram Journalist Association hruaitute vawiin khan an inkawm a, ruihhlo do kawnga hmalak dan tur an sawiho.
Aizawl Tuikhuahtlanga CYMA Committee Room-a an inkawmnaah thusawiin Central YMA president Pu Lalhmachhuana chuan Mizo ten damdawi ang thoin zu an chhiatpui tih sawiin, Aizawl khaw daifem Rangvamual leh Phunchawnga zu factory tam ta lutuk an vei thu a sawi a.
Pu Lalhmachhuana chuan ruihhlo tih hian drugs rilruah a lang lian thin a, hemi piah lamah zu leh a nghawng lam pawh ngaihtuah a ngai ta viau, a ti a. Rangvamual leh Phunchawnga zu factory a tam ta lutuk chu a vei awm hle a ti bawk.
Central YMA president chuan, Zu tha in tur hmu zo lovin Rangvamual leh Phunchawnga zu siam an in thin a, amaherawhchu heng hmuna zu siamnate hi hnatlang neia vil leh deuh a tha ang em tih chu an ngaihtuah tih sawiin, hetih rual hian mipuiin an tlin em tih pawh ngaihtuah tel a tul a ni, a ti.
Pu Lalhmachhuana sawi dan chuan, tunlai hian Mizoramah heroin a tam hle a, tunhma-a hawng 1 man a nih pawha hlawhtlinga an inngaih laiin tunah chuan KG a man tur a tam tawh hle a. Myanmar leh Manipur buaina remchanga rawn hmang an awm theih avangin, Manipur leh Myanmar-a Zohnahthlak hruaitute chu hnam inpumkhatna leh khawngaihna remchanga rawn hman tumte chu dim dawih an nih dawn loh thu hrilh hriat an ni. (AIR Aizawl)
