Chhiatna thleng thut thei hmun hrang hrangah a awm avangin mipuite fimkhur ṭheuh turin ngen
02 Sept 2024: Sawrkar thuchhuahin a tarlan danin, Kumin hian fur ruahtui a tlak tam avangin Mizoram hmun hrang hrangah chhiatna thleng a tam hle a. Leimin avanga nunna hial chân leh in leh lo chan mi engemawzat an awm a. Hmun hrang hrangah leimin avangin inkalpawhna lamah pawh harsatna tam tak a thleng bawk a. Kumin ruahsur nasa hian kawng hrang hrangin nunphung a ti khaihlak fo bawk a ni. Heng chhiatna thleng te hi sawrkar chuan pawi a tiin a tuartute pawh a tawrhpui takzet a, mipuite harsatna su kiang tur hian theihtawpin hma a la mek reng a ni.
Hetih lai hian khaw chin thlîrtu, India Meteorological Department (IMD) chuan ruah hi la sur chhunzawm zel turin a tarlang a. Kan leilungte a hnip tawh avang leh chhiatna thleng thut thei hmun hrang hrangah a awm avangin sawrkar chuan mipuite fimkhur ṭheuh turin a ngen nawn leh a. Mahni in leh a vel a tui kal dan te ennawnin, leimin thei hlauhawm leh chhiatna lian tham thlen thei awm a awm chuan thuneitute hnenah a rang lama hriattir zel turin mipuite ngenin a hriattir bawk. Ruahsur nasa avanga kawng hrang hranga harsatna awm theiah, sawrkar department hrang hrangte mahni mawhphurhna ṭheuh hlen tura theihtawp chhuah tura ngen an ni bawk.
