02 July 2024: Vawiin khan Chief Minister Pu Lalduhoma chuan Baptist Church of Mizoram Headquarters Office, Serkawn, Lunglei tawngtai inkhawm a hmanpui a. Chief Minister hi Pu K.Sapdanga, Home Minister bakah Minister dang Pu Vanlalhlana, Pi Lalrinpuii, Pu Lalthansanga, Pu B.Lalchhanzova, Pu Lalnghinglova Hmar te, Pu V.Malsawmtluanga, MLA, Pu T.Lalhlimpuia, MLA leh Pu Lalramliana Papuia MLA ten an tawiawm.
Kalkhawmten tawngtairualna an neih zawhah thusawiin Chief Minister chuan, hmanah khan he office-ah hian kan lo leng tawh a, khami tum khan min tawngtaisak a. Vawiinah hun tha tak min han buatsaihsak leh a, min han tawngtaipui leh a, ka lawm hle a ni, a ti. Kan auhla ber chu kan ramah Pathian ram lo thleng se, tih a ni a, kan policy pawimawh bik pasarih zinga a hmasa berah hei hi kan dah thin. Ram hmasawnna hnathawk turin sawrkar, kohhran leh tlawmngai pawlte hi kan pawimawh a. BCM kohhran pawh thlarau lam rawngbawlna baka Education Concern lam te, Orphanage Home te, Ruihhlo ngai enkawlna te, Skill Development lamah te hmalakna tha tak tak in nei tih ka hria a, a ropui ka ti hle, a ti a, BCM kohhran chu a kal zelna turah duhsakna a hlan a ni.
Rev. R. Lalnunzira, AGS, chuan lawmthu sawiin Baptist Church of Mizoram-in sawrkar a beisei dan leh a duhsakna te a sawi a ni.
Tawngtai inkhawm hi Rev R.Lalbiakliana, General Secretary, BCM-in a kaihruaia, tuktin zing dar 9:30 velah hetianga tawngtai inkhawm hi an neih thin thu te, Headquarters office-ah thawktu mi 72 vel an awm thu te a sawi. Rev. Dr.R.Lalthanmawia’n Minister leh MLA te hnenah kohhran aiawhin thilpek a hlan a ni.
