01 Aug 2025: Mizo Students’ Union (MSU) General Headquarters hruaitute chuan nimin khan Chief Minister Pu Lalduhoma chu a pisaah hmuin an ngaihpawimawh zawng thil hrang hrang an sawipui.
MSU hruaitute hian Mizoram Public Service Commission (MPSC) hnuaia hna hrang hrang lak mekte leh la lak chhunzawm zel turte chak taka lak anih theih nan Chief Minister hi an ngen a, Chief Minister chuan MSU-te thu thlen hi pawimawh a tiin theih tawpa hmalak pui a tum thu a sawi a. District hrang hrangah Exam Centre siam tul an tih thute an thlen bawk a ni.
MSU hruaitute hian Department-hrang hranga hna lak mek leh la lak turte chu Dan anga dik leh felfai taka la zel tur leh Dan lova hna a luh tum an awm anih pawhin huaisen taka hnawl ngam turin an ngen a, Chief Minister chuan tun hnaiah Department hrang hrangah Dan hrul deuha hnathawk tam takten an thawh rei tak avanga nghet mai tura an inngaih avanga Dan ni lova ngheh phut an awm thin chu tha lo a tih thu MSU-hruaitute hi lo hrilhin, MSU pawhin sorkar huaisen taka a kal ngam chu a thlawp tlat a, Dan ang thlap zela kal chhunzawm zel turin an ngen nghal bawk a ni. (AIR)
