19 Feb 2025: Vawiin khan Ainawn Venga Federation of Mizoram Goverment Employees & Workers te bultuma sak mek Federation Enclave Sample Flat leh Community Centre chu Pu Lalduhoma’n a hawng.
Chief Minister chuan, Vawiina FMGE&W leh Blue Mountain Co te hmalak ang hian, Aizawl chheh vela inhmun neitute leh developer te tangkawpin housing complex tha tak tak, mipuite lei phak tur ngei ni si, han din nual thei se, Aizawl hmel chu nasa takin a danglamin kan changkanpui ngei ang tiin, he Housing Complex hi tluang takin puitling thuai se ka duhsak tak zet a ni, a ti.
Er.R.Lalrammawia, President, FMGE&W pawhin thu sawiin, Mizoram sawrkar hnathawkten transfer and posting vanga chenna in din kawnga harsatna an tawh thin chhawk zangkhai a, an tana loan hmanga awlsam taka in saksa lei tur an neih theih nana buatsaih a nih thu an tarlang. A dinna hmun ram hi sawrkarin a pek a ni. Kum 2027-ah hna hi zawh an tum dawn a, booking hi an hawng tan. Kum khat chhung sawrkar hnathawk tan an hawng phawt ang a, chumi hnuah a duh apiang tan hawn zui a ni tawh ang.
Federation Enclave hi FMGE&W hnuaia Mizoram Government Employees Housing Society te chuan Blue Mountain Engineering & Services Limited nena tang dunin chhungkaw 350, mihring 2000 vel chen theihna tur Housing Complex hi kum 10 vel kalta atang khan an buaipui tan a ni.
A man tur tuna an rate dinglai chu a tlangpuiin (approximate rate) 2BHK hi Rs. Nuai 47 vel, 3BHK hi Rs. Nuai 60 vel, 4BHK hi Rs. Nuai 77 vel a ni.
