Chief Minister–in FK Toughened Glass Factory thar leh FK Oxygen leh FK Roof te a hawng
16 March 2024: Vawiin khan Chief Minister Pu Lalduhoma chuan Zuangtui Industrial Estate-a FK Toughened Glass Factory thar leh FK Oxygen leh FK Roof, mumal taka hawng lova hun engemaw chen an lo kalpui tawh te chu a hawng.
Thusawiin Chief Minister chuan, mi tumruh leh Mizoram tihhmasawn tuma mahni thiam ang anga bei thin Pu F. Kapsanga’n Industry lama hma a lo lak tawhah lawmthu a sawi a. Vawiinah a nupui fanauten an chhungkaw hmalakna an chhunzawm zel hi a lawmawm a, an zarah Industry lamah Mizoramin hmasawnna kan hmu ṭhin. Entreprenuer ṭha te hi an hlu em em a, eng ram pawh hian entreprenuer ṭha neih tam hi an duh vek thin. Mizoram sawrkarin Entreprenuer ṭha te a ngaihpawimawh thu pawh sawiin Hand Holding Policy in a tum ber pakhat chu entreprenuer ṭha te dap chhuaha, ding chhuak tura ṭanpui a ni a, ṭhalaiten he kawng hi rawn zawh uar sauh sauh se kan duh a ni, a ti.
Pu F. Lalmalsawma, Pu F. Kapsanga fapa leh an factory te enkawltu ber ni bawk chuan technical report a pe a. Darthlalang pangai aia tha zawk, a lo keh palh pawha mihring tana hlauhawm loh tur, darthlalang pangai let sariha chak zawk siam ve hi ṭha kan ti a. Mizoten Assam atangin kan chah ṭhin a, kan mamawh hunah a rawn thleng lo fova. Chumi harsatna sutkian nan chuan hma an la a ni. An khawl thar hian 4×8 feet thlenga lian darthlalang a tichak thei a. A khawl hi Gujarat atanga an lei a ni.
