Chief Minister-in tumah hlau lo turin Mizoram State Project Monitoring Committee a chah
24 Sept 2025: Vawiin khan Chief Minister Pu Lalduhoma chuan CM Conference Hall-ah Mizoram State Project Monitoring Committee Annual Report 2024-25 a tlangzarh a, Project Monitoring Committee-te hnathawh tawh chin chu a tha tawk hle a ni, a ti.
Chief Minister chuan, Project Monitoring Committee hi Mizoram mipui aiawh zo tak ni tura din a ni a, rawtna tha tak tak in rawn neih tawhte rinchhanin kal dan tha zawk kan kalpui a, a tangkai em em a ni tiin, tun atang chuan kan sorkar hnua kan hmalakna lam te in en tan thei tawh dawn a, a tir atanga in vilpui hnate chu a tha tawh hle turah kan ngai, a ti.
CM chuan, tumah hlau suh u, ruling mi leh sa nih chhuang an lo awm a nih pawhin hlau suh u, in lamah kan tang zel ang, tiin an hmalak zelna turah huai taka kal turin a chah a ni.
Kum 2024_ 2025 sawrkar kum chhungin Mizoram State chhunga project sawmli pasarih (47) an tlawh zinga sawmli pahnih (42) te chungchang he Annual Report-ah hian dah a ni a. Project kal lai mek ni tawh lo, hman tangkai lohva dah tawl tak, uiawm tak tak Mizoram Polytechnic buildings district panga (5) Champhai, Kolasib, Mamit, Lawngtlai leh Siaha a mite tlawh telin, an dinhmun theuh te he report ah hian dah tel a ni. Education Sector-ah hian a thupui ah “Zoram Rohlu – Eklavya Model Residential School” tih hmangin Central sikul Mizoram, Ministry of Tribal Affairs MoTA) in an rawn dah chungchang bengvarthlak tak, a chhiartute ngaihtuahna kaihruai thei tur zeh tel a ni bawk.
Annual Report bua lang Project an endikte dinhmun chu hetiang hi a ni:
1. Social Sector-ah project pariat,
2. Education Sector-ah project sawm,
3. Health Sector-ah project pariat,
4. Communication (Road & Bridges) ah project pasarih,
5. Veterinary Sector-ah project pakhat,
6. Fisheries an project pakhat,
7. Sports ah project panga,
8. Public Health-ah project pakhat leh
9. Agriculture Sector-ah project pakhat an ni. (DIPR)
