24 Sept 2024: Planning & Programme Implementation Department hnuaia Mizoram Startup Mission (MSUM) kaltlanga buatsaih tur, Mizoram Rahbi 5.0 chu nimin tlai 4:30 khan Chief Secretary Dr. Renu Sharma, Chairperson, Mizoram Startup Mission (MSUM), Governing Board ni bawk chuan a Pisa, MINECO, Aizawlah a hawng.
Chief Secretary Dr. Renu Sharma chuan, “He intihsiaknaah hian Mizoram mi leh sa, tunhnaia sumdawnna kawnga hma la leh helama tuimite an tel thei dawn a, hemi kaltlanga titha thlan chhuahte chuan Rs Nuai 7.5 thleng tanpuina an dawng thei dawn a ni,” a ti a. Mizoram Rahbi 5.0 chu Mizoram tana sumdawnna kawnga hmalakna thar, viak tha leh hlawhtling a nih ngei theih nana ngaihlua a tam thei ang ber tel tum turin mipuite a sawm a ni.
Ruahman dan chuan Mizoram Rahbi 5.0 a tel duh tan dilna hi October ni 31, 2024 thleng hawn a ni dawn a. November ni 18 ral hma ngeiin contestant te’n anmahni puala business plan an buatsaih an thehlut ang. Thlan chhuahte tan hian November 26-28 chhungin sumdawnna chungchang inhrilhhriatna leh sawifiah dante zirtirna neih a ni ang a, December ni 2 ah final lutte puan an ni ang. December ni 5-6 ah boot camp neihpuiin December ni 11 ah sumdawnna chungchang sawifiahna leh inhrilhhriatna tawp ber neih a ni leh ang a, December ni 12 ah result puan a ni ang. Mizoram Rahbi 5.0 hnuaia hamthatna dawng tura thlan te’n December ni 16, 2024 ah Final Business Plan an thehlut ang.
Hrechiang duh tan Mizoram Startup Hub, Planning & Programme Implementation (P&PI) Deparment, Raj Bhavan Gate ep-ah zawhfiah theih a ni a. Dilna hi Office-ah leh MSUM website www.startupmizoram.com ah ngaihven theih a ni a, Office hun chhungin thehluh tur a ni ang.
