16 Oct 2025: Vawiin khan CM Conference Hall-ah Chief Minister hovin Assam Rifles chhuahsan ram hman dan tur ngaihtuahtu Advisory Committee on AR Land te chu a tum thumna atan an thukhawm a, rawtna lut hrang hrangte an thlirho. Pu K.Sapdanga, UD & PA Minister leh Committee member-te an kal.
Meetingah hian Master Plan siam that chu an thlir leh a. Ruahmanna thar ber ang chuan a ram zawng zawng 39.33% hi mipui mamawh hmunhma sakna (built-up area) tur niin; a dang zawng 60.67% chu Green Area a ni ang.
Committee hian Aizawl Square, Ring road ni nghal siam te, a ram chhuah lama bypass road, hmar lamah Saron atanga kal, Dak inpui bula chhuak sial te, mi 2000 lenna Convention Centre, a hnuai lam lirthei park-na lian tham tak nei sak te, kawngpui kam hmun hniha Mini Park siam te, two wheeler parking siam te, Heritage Court siam te, Bypass road kiang Venghlui lam hnaiha Multi Level Car Parking leh Open Air Theatre sak te a pawm.
Tuna kawngpui awmsa hi a theih ang anga tihzauh ni se an ti a, lungphun awmsate vawnhim tha an ti a, Canteen kuala War Memorial hi MINECO-a sawn an rel.
Khatlaa Assam Rifles ram mawng lam, Mizoram Secretariat tihzauh theihna lai tur leh Loch House, tuna Mizoram sorkar kuta awm ta te hi inthlengpui dil ni se, a hlawhtlin chuan Chief Minister’s Office leh Residence sawn phei nana hman ni se, an ti.
Babu tlanga AR ram chhuahsan, Zarkawt khawtlangin enkawl an dil chu a neitu nihna nei lo va Green Park atana an enkawl theih dan tur inkaihhruaina GAD lamin lo duang se, an ti bawk. (DIPR)
