25 June 2025: Vawiin khan Govt. Of India, Ministry of Culture kaltlanga vawiin atanga hman tan Samvidhan Hatya Diwas (Constitution Murder Day) chu Art & Culture bultumin Vaivakawn Cultural Centre-ah hman a ni a, Chief Minister Pu Lalduhoma chu khuallian a ni a, Pu C. Lalsawivunga, Minister, Art & Culture chu khualzahawm a ni.
Chief Minister chuan, Samvidhan Hatya Diwas hi Politics-a inbeihna hmanruate pawh a ang thei a, keini chuan Democracy tun din leh ram Danpui humhalh a tulzia hriat thar nan kan hmang a ni, a ti a. Ram danpui hi tihdanglam theih loh a ni lo va, vawi thlengin vawi 106 vel Amend tawh a ni. Amaherawhchu amend theih a nihna hi a chhe zawnga hmang duh ruling party an lo awm erawh chuan kan himna hi tihchhiat theih a ni, a ti.
Tuna sawrkar mek hian kum 1975 a emergency lo puan tawh ang kha an duh lohzia lantirna he Diwas hi a hmang a ni a. Kan ram danpui leh democracy tundin an duhzia an tilang a ni. Chutiang rilru pu an nih avang chuan ngaihngamin kan awm thei ang. Amaherawhchu kan mit leh beng kan chhit reng erawh chu a ngai thung. Kan zirlaite leh thangtharten kan ram leh hnam himna hi engtik lai mahin kan ngaihthah tur a ni lo, a ti.
Chief Minister chuan, Article 371G ah kan inhumhimna (special provision) fel taka dah a ni a, Eastern Bengal Frontier Regulation Act 1873 hmangin Inner Line Regulation leh non tribal ten kan ramah ram an neih ve theih lohna a awm bawk a. Danpuiin min humhim tlat avang leh democracy lungphum, zalenna kan neih avangin he ramah hian kan him a ni, kan ti mai a ni. He dan hi palzut a nih chuan engkim a lo derthawng nghal mai ang, a ti. 6th scheduled, kan tana tha em em kha kan ADC pathumah chauh a lo nung ta si a, tih nun thar leh a tha lawm ni tia inrawnkhawm te hi a tha hialin ka hria, a ti.
Khuallian hian ILP khauh zawka kalpui a nih tur thu pawh a tarlang a ni.
Khualzahawm Pu C.Lalsawivunga, Minister, Art & Culture pawhin thu a sawi bawk. He Diwas hi kum khat chhung hman tur a ni.
Kum 1975 June ni 25 khan kha tih laia India Prime Minister Pi Indira Gandhi chuan Internal Disturbances chhuanlamin Article 352 hnuaiah Emergency a puang a, thla 21 zet a awh a ni. Kumin hi a kum 50 na cham niin central sawrkar chuan hetianga hmang tur hian ruahmanna a rawn siam ta a ni. (DIPR)
