CM hovin International Day Against Drug Abuse & Illicit Trafficking, 2024 hman a ni
26 June 2024: International Day Against Drug Abuse & Illicit Trafficking, 2024 chu vawiin khan Vanapa Hall-ah hman a ni a. Chief Minister Pu Lalduhoma chuan he hun hi hmanpuiin; Mizoram mipui zawng zawngte chu ruihhlo leh dan lova ruihhlo phurh dona hna thawhpuiah a sawm.
Chief Minister chuan, hun rei tak reh tawh State Level Ruihhlo Do Core Committee kan tinung thar a, Supply Reduction mawhphurhna hi Excise & Narcotics kutah dahin Demand Reduction hi Social Welfare & Tribal Affairs kutah dah a, kan tlawmngaipawl hrang hrangte inpekna pawh a ropui hle, an chungah lawmthu ka sawi a ni, a ti. Central sawrkar hnuaia hmalakna peng hrang hrang Narco Co-ordination Center (NCORD) te, Anti-Narcotics Task Force (ANTF) te, Nasha Mukt Bharat Abiyaan (NMBA) te pawh tha takin kan kalpui reng bawk, a ti a. Mitin huapa do ngai anih avangin kohhran hrang hrang leh tlawmngaipawlte, kan ram mipui zawng zawngte hi thawhpuiah kan sawm a ni, a ti.
Khualzahawm Pi Lalrinpuii, Health Minister pawhin; kawng dangah nasa takin hma sawn mah ila a hmang tangkaitu tur mipuite, a bikin kan thangtharte ruihhlovin min tihchhiatsak zel chuan a pawi dawn lutuk a, hei hian ka rilru a luah nasa thin a ni, a ti. Ngawlvei te enkawlna lama Social Welfare & Tribal Affairs department hmalakna hrang hrangte a tarlang bawk.
Excise & Narcotics Minister Pu Lalnghinglova Hmar pawhin, ruihhlo dona lamah sawrkar hian mipuite duh khawp kan la phak chiah lo a nih pawhin kan theihtawp kan chhuah, kan bei zel dawn, a ti.
