06 Oct 2025: Vawiin chawhma khan Chief Minister Conference Hall, Aizawlah Special Assistance to States for Capital Investment (SASCI) hnuaia Department hrang hrang kaltlanga hmalakna kalpui dan thlirletna hun hman a ni a. Chief Minister Pu Lalduhoma hun he hun hi kaihruaiin Home Minister Pu K.Sapdanga, PWD Minister Pu Vanlalhlana, EF&CC Minister Pu Lalthansanga, Agriculture & Farmers Welfare Minister Pu PC Vanlalruata, Health & Family Welfare Minister Pi Lalrinpuii, Power & Electricity Department Minister Pu F.Rodingliana, Sports & Youth Services Minister Pu Lalnghinglova Hmar leh Adviser to Chief Minister (Finance & Planning) Pu TBC Lalvenchhunga te an tel a. SASCI hnuaia hmalakna kalpuitu Official-te an tel bawk a ni.
Chief Minister Pu Lalduhoma chuan SASCI chu Department hrang hrang kaltlanga hmasawnna hna thawhna tur a nih angin, hmalaknate a hun taka zawh fel thin a nih theih nan ngaih pawimawh a tul thu a sawi a. Department thenkhata thawktute inthlahdahnain SASCI kaltlanga hna tha taka thawktu Department dangte a tih khawtlai phah theih avangin thawktute inthlahdah lo turin a chah a. SASCI hnuaia hnate tha taka thawhin a kum leh a ruahmanna kalpui dan tur nasa taka a hril lawk thu Chief Minister chuan sawiin, department hotute chu a hun taka hna zo fel hman turin a chah a ni.
Finance Department buatsaih, kum 2020-25 chhunga SASCI hnuaia project hrang hrang dinhmunte chu Pu Ramchuana, Secretary, Finance Department chuan Powerpoint Presentation hmangin a tarlang a. Kum 2024-25 chhunga Project kal lai, Expenditure Sanction la awm lo, PWD hnuaiah Project 3, Agriculture & Farmers Welfare Department hnuaiah Project 3, Disaster Management & Rehabilitation hnuaiah Project 2, UD&PA hnuaiah Project 1, Food Civil Supplies & Consumer Affairs, Tourism, Land Resources & Soil Conservation leh Irrigation & Water Resources Department hnuaia project 1 theuhte chu thlirlet a ni a. PWD hnuaia Working Women Hostel sak hna chak zawka bawhzui dan tur leh PM Ekta Mall (Unity Mall) sak hna sawt zawka kalpui dan turte sawi ho a ni bawk. (DIPR)
