01 April 2025: Vawiin khan E. Lungdar Mini Sports Complex-ah Pu Lalduhoma, Chief Minister chuan Tuichangral Championship 2025 a hawng a. Infiammite chu chak tuma theihtawp chhuaha bei thin, chak loh pawh thiam, beidawng ve ngai si lo ni turin a chah. A hawnna inkhawmah hian Pu Lalnghinglova Hmar, Sports Minister chu khualzahawm a ni.
Thu a sawinaah Chief chuan, kum 1970 chho atanga lo kalpui tan tawh he intihsiakna hian ngaihhlut a hlawh thin a, Infiamna ngaina tak in nih avangin infiammite pawhin an chhawr a, Mizoramin Olympian pahnih chauh kan la nei a, chu ta pakhat zawk chu E. Lungdar chhuak, C. Lalremsanga, Archer a ni, tiin tun hnaiah professional footballer engemawzat in chher chhuak tawh bawk, a ti.
Sawrkar hian kan naupang talent nei tha te zawn chhuah a, training tha tak pea, Olympic 2036 a India aiawh thei khawpa buatsaih kan tum a, kumin Tuichangral Championship pawh hi naupang talent zawn nan kan hmang dawn a ni, a ti.
Infiamna hian chak zawk nih dan te, chak lo zawk nih dan te pawh min zirtir a, mihringte hi kan thil tih tinrengah kan hlawhtling vek thei bik lo, kan hlawhchham chang pawh a awm a, chu chu kan pawm thiam a ngai a ni tiin, intihsiakna beitute zawng zawng duhsakna ka hlan a, chak tuma bei, chak loh pawh thiam, beidawng ngai lo, lo ni theuh ang che u, tiin a chah a ni.
Pu Lalnghinglova Hmar, Minister, Sports & Youth Services pawhin thusawiin, naupang talent nei thate kan rawn zawng a, nakumah pawh kan la rawn zawng leh ang tiin, he Games-ah hian tawp mai tum lo ula, C.Lalremsanga anga Olympic khel thei nih lo tum ang che u, tiin a chah.
TGSA huam chhungah khaw 33 an awma, kuminah hian khaw 17 an inlan dawn a, a vaiin inelna chi 15 ah an nei ang.
