11 March 2024: Chief Minister Pu Lalduhoma chuan IR (Indian Reserve) Battalion din chu Mizoram-in a tihsual lianpui a ni, a ti.
He thu hi vawiina Assembly thutkhawmah sawiin Pu Lalduhoma chuan IR Battalion chu Mizoram ta a ni lova, Mizoram thuhnuaia awm a ni lo bawk a, Sawrkar laipuiin duh hun huna a tirhchhuah thin a ni a ti a, Mizoram pawna an tirhchhuah pawhin an hlawh leh an senso zawng zawng state sawrkar tum vek a ni a, mi state-te police tur Mizoram Sawrkar-in a tum kep a ni ringawt a, a âtthlak takzet a ni, a ti.
Sawrkar-in a lak hunlaiin state sawrkar hnuaia awm tur Mizo Battalion din turin a nawr naa a hunlaia thuneitute’n Police-a an mite thun chak avangin an titlang lui tlat a ni, a ti a; tunah hian mi fahrawn enkawl angin mi fa an chawm reng a, tihtawp a ni thei tawh si lova, a pawi takzet a ni, a ti.
Chief Minister chuan Mizoram a Police-te chu an fit-lo hle a ni a ti a; kut vûng, ke vûng, Minister-te PSO atan pawha itawm loh tak tak te an ni a; PSO training mang lova certificate nei te pawh an awm a ni a ti a; hetiang bawk hian an fate zirtirtu atana an duh miah loh tur tam tak zirtirtu lak an ni bawk a ni, a ti.
Nimin Assembly thutkhawma Tuirial bialtu Pu K.Laldawngliana zawhna chhangin General Administration enkawltu Chief Minister Pu Lalduhoma chuan, Mizoram Sawrkar hnathawk zingah an entitlement aia tam staff leh lirthei kawl a ruka endiktu tur an ruat a ti a; endiktute’n an hriat emaw report an dawng a nih chuan Sawrkar-in action a la dawn tih a sawi.
Pu Lalduhoma chuan Sawrkar phal chin bak staff leh lirthei kawl thin an awm anih chuan kumin February chhunga inchingfel turin an hriattir tih sawiin, a hnu lama kawl hriat an nih chuan action lak a ni dawn tih a sawi bawk. (AIR)
