28 March 2025: Vawiin khan Land Resources, Soil & Water Conservation department ten ATI Auditorium, MINECO ah Kuva chingtute tan Training cum Seminar on Scientific Method of Cultivation of Arecanut & Pest Management an buatsaih a. A hawnna inkhawm hi Chief Minister Pu Lalduhoma chuan a telpui a, Pu Lalthansanga, Minister, LRS & WC chu khualzahawm a ni.
Chief Minister chuan, Myanmar lam atanga dan lo va kuva lakluh a nih thin avangin kan rama Kuva chingtuten in hralh tha hlei thei lo va, Sawrkarna kan rawn lak ve leh in harsatnate tihtawp tumin hma kan la nghal chat a ni, a ti. Vawiinah chuan a tawlhruk chingte pawh an tawmim tawh hlein ka hria, Zaa za han tihrem nghal barh chu a la harsa deuh va, kan la bei zel dawn a ni, a ti.
CM Pu Lalduhoma chuan, hlawk zawka kuva in hralh theih nan a process-na lam hi i din ve ang u, kan ti a. NEC ah Rs. vbch 7.43 kan thehlut a, min rawn sanction tawh a. Chemphaiah leh Zamuangah Kuva Processing unit din kan tum, khawl hmangin kan tiro ang a, a khehna kawrin leitha kan siam ang a, a rah hmin thate a Skop ah kan siam ang a, a hawngte chu plate-ah siam kan tum bawk, a ti.
Chief Minister chuan, tlangram vata lo neih kan la uar hle a, a hlawk si lo va, ram a tichhe nasa bawk si a, huan nghet neia hmalak hi a tul hle. Chutiang atana tha chu Kuva hi a ni. Kan sik leh sa a inthlak zel avangin Mamit leh Kolasib ah chauh ni lovin district dangah pawh a chin chhoh theih tan a ni, a ti.
Chief Minister hian kuva chingtu mi pathum hnenah lawmman a hlan a, a dawngtute chu: Mizorama kuva chin bultantu Pu Lalbiakseia, Bilkhawthlir, kum 1965 atanga ching tantu, Mizorama kuva kung ngah ber Pu Saikhalha, Zamuang, kuva kung singthum chuang neitu leh kuva enkawl dan tawnhriat tha tak tak neia midangte tanpuitu Pu Zamzela, Tuikhuahtlang te an ni.
