14 Feb 2025: “Service rivalry a nasaa, service association thenkhat phei hi chuan pressure group emaw an inti ta em aw tih theihin an kal. Service Association hrang hrangin min rawn hmu thin a, ram tana tha tur rawn sawi hi an vang hle. An pawl tan, an hamthat nan thu an rawn keng deuh zel, hei hi bansan ang u”
He thu hi vawiin chhuna Mizoram sawrkar doctor Association (MGDA) te’n Aijal Club-a Annual General Conference vawi 39-na an hmannaah Chief minister Pu Lalduhoma chuan sawiin, ram tana tha hi huai takin kan ti mai dawn a, mi tlemte hamthatna aiin mipui nawlpui hamthatna a lal zel dawn, a tul phawt chuan a awmsa pawh kan thiat ang a, a thar pawh kan din ang, a ti.
Pu Lalduhoma chuan, sawrkar hnathawkte hi kan theih ang tawkin kan duat. Kan sawrkar ve hnu December 2023 atanga January 2025 thleng khan sawrkar hnathawkte GPF hi Rs. Vbch 782 kan pe chhuak tawh a, Pension charge atan ringawt pawh hian Rs. vbch 1278 kan pe chhuak tawh, a ti.
