CM-in ngaihtuahna thar pua kangmei laka ram venghim tura thapui thawh thar turin mipuite a sawm
05 Feb 2024: Vawiin khan Synod Conference Hall-ah Chief Minister Pu Lalduhoma chuan “Kangmei Ven Hapta, 2024” a hawng.
A hawnna thusawiin Chief Minister chuan, kan pi leh pute khan ram kang pawizia an hriat avangin Lo leh huan an hal dawnin tha takin Meilam an sial a, Meilu khaiin an hal chauh thin. Vanduai thila kangmei a chhuah palh pawhin a pachhuakin a thelh turin an bei vata, rang takin an thelh leh thin. Keini, thangthar fing zawka ngaihte hian kan ram hi kan tikang nasa hle a, ramngaw venhim thuah kan pi leh pute kan tluk ta lo niin a lang a ni. Kan eizawnna atana lohtheih lohva lo kan hal hi chu engpawh a ni a, kan fimkhur loh avanga kan tihkang thin hi en liam a har em em a ni. Chuvang chuan ngaihtuahna thar pua kangmei laka kan ram venghim tura thapui thawh thar turin mipuite ka sawm a. Kumina kan thupui pawhin chu chu a tum a ni. Fimkhur loh vang te, suahsual vanga ram tikangte phei chu an chungah dan anga hma lo la ngei turin hmuntina dan lekkawhtute ka chah a ni. State Level Committee on Fire Prevention te, District Level Committee leh Village Level Committee te, tlawmngaipawl leh ramkang venhimna lama mi thahnemngai zawng zawngte; hapta chhunga hmalakna tha tak lo nei tur leh hapta zawh hnuah pawh lo bawhzui zel turin a chah a. Kan ram hi vawiin leh naktuka chhuan lo la awm zel turte tan chenna tlak ram thaah kan siam ngei tur a ni, tiin a sawi a ni.
He huna khuallian, Pu Lalthansanga, Minister, EF&CC leh Chairman, State Level Sub Committee on Fire Prevention pawhin thusawina hun a hmang a ni. He hunah hian Pu Ashok Kumar Biswal, IFS, PCCF leh Member Secretary State Level Committee on Fire Prevention chuan Kangmei ven hapta hman chhan leh hmalak dan tlangpui a sawi a. Pi Kamal Preet, IFS, APCCF & Member Secretary, SLSC on Fire Prevention chuan kalkhawmte lawmna thu sawiin Pu Laltlanhlua Zathang, IFS, CF (P) chuan a lem nena en theihin Mizoram ramngaw leh nungchate dinhmun sawifiahna a nei a, a kaihhruaina hnuaiah kalkhawm ten Fire Prevention Week thutiam an sawi rual a ni.
