08 Jan 2024: Chief Minister Pu Lalduhoma’n sawrkar lakluh nia a thusawi ni 100 chhunga thawh tura an duan tam tak an ti hlawhtling tawh a ti a, a dang pawh tih hlawhtlin tumin theih tawpin hmalak zel a ni a ti.
Vawiina ZPM Party Office kumin atana hawnna leh chhung inkhawmah he thu hi sawiin Chief Minister chuan ni 100 chhunga hnathawh tura an duan tam tak tih hlawhtlin a awm tawh tih sawiin adang tih hlawhtlin tumin hmalak zel a ni a ti a, Opposition party te chu chona thianghlima cho an duh tih sawiin kum 5 a ral leh hunah ZPM let thla tur khawpin inbuatsaih se an duh a ti a, eng party mahin an kalphung hlui angin an hneh tawh dawnlo tih a sawi.
Pu Lalduhoma chuan Myanmar atanga raltlan lokalte chhinchhiahna Biometric Identification chu sawrkar hmasa hmalakna kal zel an chhunzawm mai tur a ni a ti a, fimkhur zawka kal kan tum tih sawiin thlamuang taka an awmhona tur ruahmanna Union Home Minister atangin thu an dawng tih a sawi.
CM chuan Ramdang mi kan rama ILP hmanga lo lutte an vei awm tih sawiin Mizoramah heng mite chhinchhiahna tur felfai leh changkang zawk siam thei an awm a, hmalak tum a ni a ti a, Hna kal lai, loh theih loh a chhunzawm ngai a awm tih sawiin cancel ngai erawh engemawzat awmin heng sum chuang bang hi ba rulh nan an hmang dawn tih a sawi.
Pu Lalduhoma chuan Officer pension tawh, sawrkar atanga hamthatna la kan la awm tih sawiin heng mite hi reilote chhunga inchingfel turin warning an pe a ti a, Mipuite chhiah tling khawm, a hman lohna tura hmang an awm chuan corruption a ni a, endiktu leh enthlatu kan ruat tawh a, engkim chiang takin kan hre zel tawh dawn a ni a ti bawk.
Vawiin Party Office hawn inkhawm hi Pu Lalliansawta, President chuan a kaihruai a, Rev.Lalchungnunga, Mission Veng chuan hunserh a hmang a, MLA tling tharte ZONU leh GAD atangin lawmpuina thilpek hlan an ni bawk. (AIR)
