CM-in Training for Government Advocates/Public Prosecutors & Nodal Officers of Court Cases a hawng
07 Oct 2025: Vawiin khan Chief Minister Pu Lalduhoma chuan a department enkawl Law & Judicial buatsaih Training for Government Advocates/Public Prosecutors & Nodal Officers of Court Cases, I&PR Auditorium-a buatsaih chu a hawng.
Chief Minister chuan, Sorkar Ukil te hi sorkar tana inhlawha court-a ding thin in ni satliah lo va, dikna vawnghimtu, mipui sorkara mipui aw, mipui leh sorkar chanvo vengtu leh haichhuah saktu in ni a, Court-a sorkar aw (voice) in nih avangin mi dik lote hmaa tlawm duh ngai lo nun hi nangmahni kaihruaitu ni ngei se ka duh hle a ni, a ti. Sorkar ukil kan ni emaw, private ukil kan ni emaw, ukil tha chu a achievement atanga teh a ni tih hretu vek kan ni a, uluk takin kan thlir reng che u a ni, a ti bawk.
CM chuan, mi tam tak chu thahnemngai takin in thawk tih kan hria a, heng mite chungah hian kan lawm thin hle. Amaherawh chu, kan chak ngei ngeina tur nia kan ngaih case thenkhatah delay a awm vanga sorkar tanhmun a chhiat phahna a thleng zauh zauh thung a, he mi kawngah hian kan fimkhur a tul a ni, a ti.
Tuna Central Criminal Law thar pathum leh Inter operable Criminal Justice System (ICJS) tha taka kalpui a nih theih nan Directorate of Prosecution din turin chak takin hma kan la mek a, Study group-te dinin an recommendation pawh sorkarah an rawn thehlut tawh tiin, Cabinet-a chhawpchhuah tura hmalak mek a ni, a ti bawk.
Chief minister chuan, he training hian kan hriatna chauh tipung lovin ram tana kan inpekna pawh tipung se, dikna tundin hi Law Professional kan nih chhan leh kan hnain a tum ber a ni tih a tharin i hre nawn ang u, a ti.
Pu T.L Guite, Secretary, Law & Judicial pawhin thusawiin, hetiang training hi tun hma khan kan nei thin a, hun engemaw chen kha kan chhunzawm thei ta lo va, kuminah a bul kan han tan thar leh ta a ni, a ti. District hrang hrang atanga kal khawm sorkar ukil-te leh Court case awmna department-a Nodal Officer te an tel a, chipchiar takin training an nei dawn a ni, a ti.
A hawnna inkhawm hi Pu R.Zahmingthanga, Addl. Secy, Law & Judicial chuan a kaihruai a, Pi Melody Lalrochampuiin lawmthu sawiin a khar a, Training neih zui nghal a ni. (DIPR)
