27 Feb 2024: Chief Minister, Finance changtu ni bawk Pu Lalduhoma’n kum 2024-2025 Mizoram budget ruahman, Rs vaibelchhe 14412.12 chu Assembly thutkhawmah vawiin khan a pharh.
Chief Minsiter Pu Lalduhoma chuan an ngaih pawimawh ber chu Zoram mipuite tana ei leh bar zawnna kawng tlo leh nghet zawk buathsaih a nih thu a sawi a. Kum kal meka state economy thanna chu 10.14% a nih laiin, kum 2024-25 chungin 11.03% a than beisei anih thute a sawi.
CM Pu Lalduhoma chaun kum 2024- 2025 chu sum renchem, sum dinhmun insawh nghehna kum a ni a ti a, chuti chung chuan hmasawnna hnathawh tur erawh a pun tho thu a sawi.
Vawiina Mizoram budget a pharh zawh hnuah Assembly House Annex Building, Conference hall ah thuthar thehdarhtute kawmin Pu Lalduhoma chuan, kum 2024-2025 sorkar inrelbawlna atana hmantur awm zat, revenue expenditure chu Rs vbc 14412.2 a ni a ti a, hmasawnna hnathawh tura sum ruahman chu Rs vbc 2455.08 a ni a ti bawk.
Sawrkar Flagship Progamme, Bana kaih (Hand Holding policy) hmanga ram chhunga kuthnathawk te tihmasawnna turin Rs vbc 200.00 ruahman a nih thu leh he policy kaihnawih department te chu an scheme leh proposal te azirin sawkarin a tul angin sum a pe dawn a ti bawk.
Thuthar lakhawmtute zawh belhna chhangin Pu Lalduhoma chuan an sorkar tirhah thlai lei nana an dah hran Rs vbc 10 nen belhbawmin bana kaih policy atan hian avaiin Rs vbc 310 a awm tak thu a sawi.
Kumin budget-ah hian kum danga la tih ngaihloh a vawi khatna atan Gender Budget statement-hmeichhiate hamthatna tura duan pharh tel a ni tiin, kum 2024-25 chhunga sum hmuh tura beisei Rs vbc 14412.12 chu kum kal mek 2023-24 ruahmanna Rs 14209.95 aiin 1.42% in a pung hret a ti a, kum thar 2024-25 chhunga sorkar sum puk tur ruahman chin chu Rs vbc 1992.03 a ni a ti bawk. (DD)
