09 June 2025: Vawiin khan Chief Minister Pu Lalduhoma chuan Irrigation & Water Resources Department Auditorium, MINECO ah World Bank suma din Mizoram Water Informatics Centre a hawng.
Chief Minister chuan, hmun 82 atanga tui data chi hrang hrang, darkar tina min hrilh hre thei centre changtlung tak kan nei ta hi thil lawmawm leh scientific lama kan ram hmasawnna chhinchhiahtlak a ni. Hetiang centre changtlung kan lo neih tak avangin, tui lam data mamawhtu department leh institution ten he centre hi ring tlang ila, data thuhmun hmangin hna thawk ila a tha hle ang, a ti.
National Hydrology Project hnuaia National Water Informatics Centre chuan state zawng zawng mamawh min phuhruk zo lo va. State Centre lo neih theih hi central sawrkar lam duh dan a lo ni bawk nen, he centre din hi kan remti ta a. Sum leh pai hi World Bank lamin an tum a ni, a ti.
Chief Minister hian Tlawng Lui Lian tur Hriatlawk theihna (Tlawng lui Early Warning System) chu a hawng nghal a, he system hi DM & R department nena enkawl tur a ni.
Er. K.Hamlet, SE (P & M), Director, Mz-SWIC chuan centre hnathawh dan tur chipchiar takin a sawifiah a, he centre hi Mizorama tui kaihhnawih hriat tur pawimawh zawng zawng hriat theihna tura ruahman a ni a. Lui tui luang zat te, ruah tui tla zat te, boruaka tui hu awm zat te, lei hnuaia tui level te leh sik leh sa lam data kan neih theihna turin hna a thawk ang. Mizoram hmun 82 ah heng data lakkhawmna hmun hi bun fel vek tawh a ni a, centre-ah hian darkar tin data an rawn thawn thin ang. Mizoram Water Resources Information System leh Tuilian Warning System pawh he centre kaltlang hian siam a ni.
