College zirtirtu transfer & posting chungchangah MSU RHQ Lunglei hruaituten H&TE Minister an hmu

17 July 2026: Vawiinah MSU Regional Hqrs Lunglei hruaitute leh Higher & Technical Education Minister Dr. Vanlalthlana chu a chamber-ah College zirtirtu transfer & posting leh Mizoram Engineering College chungchangah inkawmhona hun an hmang.

MSU Regional Hqrs Lunglei hruaitute’n Lunglei a College lian 2-a zirtirtu 6 lai mai sawn chhuah a nih laia 2 chauh dah thar an ni chu hriatthiam harsa an tih thu leh Post ruak chu hnawhkhah vat an duh thu an thlen a, Mizoram Engineering College pawh Sorkar thlen chin leh hmalak dan te zawt fiahin a rang thei ang bera hma la turin an ngen bawk.

Dr. Vanlalthlana H&TE minister chuan, College zawng zawng zirtirtu an neih zatte leh an workload a zira siam rem an nih thu a sawi a, College zirtirtu lak chhuah la hnawhkhah loh te chu RUSA hnuai atanga zirtirtu mi 58 lak tawh atangin hnawh khah leh vek a nih tur thu sawiin, RUSA hnuaia zirtirtu lak tawhte chu DP&AR ah file a la tan avanga la fel lo deuh a nih thu te leh tih fel a nih veleh a an post-ah dah nghal tum a nih thu a sawi bawk.

Tin, Mizoram Engineering College pawh hmalakna ala kal zel thu sawiin, Approval hmuh tlai anih avangte leh MPSC-in zirtirtu ala lak fel loh avangte, a kal kawng siamnaa mimal ram chungchangah harsatna an tawh avanga a hun taka class tan theih anih loh thu sawiin, a thuam that nan Ra nuai 300 awmsa atangin nuai 40 dah belh leh anih tawh thu a sawi bawk.