Core Committee on Ruihhlo Do hmalakna atan Rs Nuai 300 chuang seng tawh

27 March 2026: March ni 25–27, 2026 chhunga Tlabung Licheng Suarherawt Runa Young Mizo Association (YMA) Sub-Headquarters Lunglei Inkhawmpui vawi 40-na hman chu March ni 26 (Ningani) zan khan Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga chuan Khuallian niin a hmanpui.

Khuallian Pu V. Malsawmtluanga chuan YMA kumpuan “Ruihhlo Do” chu Mizoram sawrkar pawhin thupui bera a neih mek a nih thu sawiin, ruihhlo do kawnga hma la tura a bika din Core Committee on Ruihhlo Do hma lakna atan cheng nuai 300 chuang sawrkarin a sen tawh thu a sawi a. Excise & Narcotics Department thuam chak nan lirthei 21 lei a nih tawh thu te, ruihhlo do kawnga beihpui thlakna ‘Operation Jericho’ chak taka kalpui mek a nih thu leh sawrkar kum kal mekah cheng vaibelchhe 1,047 chuang hu ruihhlo man a nih tawh thu te a sawi.

Pu V. Malsawmtluanga chuan Mizo hnam peng hrang hrangte inkarah inunauna leh inpumkhatna nghet zawk a awm theih nan sawrkarin theih tawpa hma a lak thu sawiin, Mizo hnam peng hrang hrang ṭobul ziaka vawn ṭhat theih tur buatsaih tuma sawrkarin hma a lak mek thu a sawi a. Zo nun ze mawi nunpui a, chawi san chuan aia upa zahna a ken tel thu leh mi dangte tana hriat nuam tura ṭawngkam hawihhawm hman hram hram chu Zo nun ze mawi nihphunga bet tlat a nih thu sawiin, YMA member-te chu ruihhlo laka inthiar fihlim a, theih tawp chhuaha ruihhlo do turin leh Zo nun ze mawi chawi sang a, nunpui zel turin a chah.

YMA Sub-Headquarters Lunglei Inkhawmpui vawi 40-naah hian hmun hrang hrang aṭanga palai riak lut 700 vel an awm a. Vawiin khan hruaitu thar thlan niin, President atan Pu K. Lalfakzuala, Vice President atan Pu Zothanzuala Hnamte, Secretary atan Pu C. Lalrindika, Assistant Secretary atan Pu H. Lalhmingthanga, Treasurer atan Pu K. Vanlalhruaia leh Finance Secretary atan Pu R. Lallawmkima te thlan an ni.

Tun dinhmunah YMA Sub-Headquarters Lunglei hnuaiah hian YMA group 11 awm mekin, YMA branch 119 a awm a. Member inchhiarna hnuhnung bera a lan danin Lunglei Sub-Headquarters huam chhungah hian YMA member mipa 33,565 leh hmeichhia 16,865, an zavaiin member 50,430 an awm mek a ni. (DIPR)