“Corruption Do turin kan hotuten ruahmanna an siam fel tawh” – Pu Lalduhoma Leader, ZPM
Aug ni 30 khan ZPM Leader Pu Lalduhoma MLA chuan Buarpuitlang dung (Lunglei West bial chhung)-ah campaign neiin hun a hmang.
Serte Village Council Hall a Vantlang inkhawm buatsaihah Lunglei West Block I leh Block II atanga ZPM Party zawm tharte a lawm lut a, mi tute pawh ZPM Party zawm tura sawmin; ZPM hi mipuite ta tura din a ni, a ti.
Pu Lalduhoma chuan, MNF leh Congress-te hun hi a liam mek a, chu chu mipuite hmuh dan a ni a, ram kalphung a inher a, hemi ang hian kan inherrem a tul a ni a ti. Pathianin a hunlaia a ruatte hi rahbeh theih a ni lova, MNF leh Congress-te hi Pathianin mal a lo sawm tawh a, vawiinah hian ZPM hun a lo inher chhuak ve mek niin a lang, a ti.
Pu Lalduhoma chuan, Sorkarna hi Pathian leh mipui zarah kan chang ve a nih chuan kan budget pharh turah leiba nasa takin min delh mahse, Delhi leh State dang te pawh hetiang hi an lo ni tawh a, mahse roreltute an inthlaka vawiinah chuan a hmasawn zawngin an kal tawh a, keini pawh kum hnih khat hnuah chuan insiamthat theih tura hnathawkin hmalak kan tum a ni, a ti.
ZPM Leader chuan, Lunglei West bial mipuite tan helai tlangdung kawngpuite hi State Highway-ah puan ni ta se, mipuite eizawnna leh kawng hrang hrang bakah Aizawl khawpui panna thlengin a awlsam dawn a, Pathian zarah thil titheia kan awm a, sum dinhmunten a zir chuan State Highway-ah kan puang ang, a ti.
Pu Lalduhoma chuan, Rorelna fel kan neih theihna turin Pathian thu hi a hmanrua tur a ni a ti a. Corruption do turin a do dan turah kan hotuten hma an la a, corruption measure tur pawh an duang fel tawh a, he ramah hian Sorkar tha, mipui Sorkar a lo din theih nan mipuiten min puih kan mamawh a, kan Candidate te min vote tlin sak theuh turin mipuite kan sawm a ni, a ti.
