17 Jan 2024: Art & Culture Department Lunglei, Mizo Cultural Organization Hqrs Lunglei leh Vanhne khawtlang hruaitute buatsaihin vawiin khan Lunglei bul Vanhne khuaah Cultural Festival buatsaih niin he hun hi Pu Lalzuithanga Chairman, LMC chuan khuallian niin a hmanpui.
Cultural Festival hawnna inkhawm hi Pu R.Lalsangvunga President, MCO Hqrs Lungleiin a kaihruai a, khuallian LMC Chairman Pu Lalzuithanga chuan Festival hawnna thu sawiin, Mizo hi kan Culture tello chuan Mizo kan ni zolo a ni tiin kan hnam tihdan phung kan bosal a hnamdang tihdan phung kan ngaihsan zawk chuan Mizo tih tur kan awm lo thuai ang a ti. Pu Zuia chuan Mizo kan nihna langsar tak mai chu kan hnam zai dan leh lam dan te hi a ni tiin kan chawinun zel a ngai a, hetiang kara mi thahnemngaiten Cultural Festival an buatsaih hi a lawmawm hle a ni tiin, hemi kawngah hian Art & Culture Department chu department lian tak ni lem lo leh sum pawh nei em em lo nimahse, an thahnemngaihna leh an inpekna a fakawm hle a ni, a ti. Tlawmngai pawl hrang hrangten kan Culture humhalh tura an inpekna zawng zawng pawh an fakawm hle a ni a ti.
Khuallian Pu Lalzuithanga chuan Mizo kan nihna chawinung reng turin kan hnam tihdan leh kalphungte thangthar zawkten ngaihhlutna chang hriain chawinung zel turin rilru thar i pu theuh ang u, a ti. Vanhne khua a Cultural Festival-ah hian Lunglei khawpui chhunga Cultural Club hrang hrangte bakah Zirlai Pawl leh YMA Branch leh YMA Branch-ten Mizo hnam lam chi hrang hrang entirin, Phenglawng leh Lemlawi bakah Hnah tum te entir niin, zaithiam hrang hrang te an zai bawk a, Pu R.K. Lalawmpuia Senior Research Officer Art & Culture Department Lunglei chuan lawmthu sawiin hun hi a khar a ni.
