Data/Statistics mumal neih a tul zia hrethar turin chah

29 June 2026: District Research Office, Economics & Statistic Lunglei buatsaihin vawiin chawhma dar 11:00 khan DRO Conference Hall, Bazarveng, Lungleiah 20th National Statistics Day hman niin, thupui atan “Unlocking the Potential, of Administration Data” tih hman a ni.

National Statistics Day puala hun hman hi Pu P.C.Vanlalrova, District Research Officer-in a kaihruaia, he huna khuallian Pu H.Lalthansanga President, MJA Dist Hqrs Lunglei chuan, Mizorama Sawrkar Department tam tak zingah hian Economics & Statistics Department hi a pawimawh berte zing a mi a nih a rinawm a, mipuite pawhin an hnathawh leh ram tana an tangkaina te hi kan hriat chian a pawimawh hle a ni tiin, zirlaite tan phei chuan he department leh an kutchhuak hriat chian hi hmalam hun atan thil tangkai tak a ni ang a ti.

Tunlaiah Sawrkarin mimal document hrang hrangte inmil thlap a duh tawh avangin mi tam takin hna zawnna kawngah leh thil dangah te Document fel tawklo avangin harsatna an tawk thin a, chutianga mitinte mamawh document felfai kan neih theihna atana thawktute chu Economics & Statistic Department a thawktute hi an ni khuallian chuan tiin, an pawimawhna hlut thiam leh hmang tangkai thiam apiangte chuan hma an sawn dawn a ni, a ti.

Sawrkarin hmasawnna hna hrang hrang a thawh dawn leh Policy a kalpui dawnin Data mumal tak nei sain hma a la thin a, chuvangin vawiina National Statistics Day kan hman atang hian Data mumal neih a tul zia leh a pawimawh zia hre thar ila, Statistics mumal tak neih hi kawng hrang hranga hmasawnna bul pawimawh a ni tih i hre thar ang u Pu H.Lalthansanga chuan a ti.

Pu C.Lalhmangaiha Inspector of Statistics pawhin National Statistics Day lo chhuahna chhan sawiin ni Statistic lama mithiam Prof. Mahalanobis ” Father of Indian Stataistics” piancham denchhenin kumtin June ni 29 ah hman thin a ni a ti a, Father of Indian Statistics chanchin tlangpui leh a thil tih langsar tak takte a tarlang a ni.